Forcimi i bashkëpunimit në fushën e sigurisë kibernetike dhe mbrojtja e infrastrukturës kritike ishin në fokus të takimit zyrtar të zhvilluar në Washington, D.C., ndërmjet Autoritetit Kombëtar për Sigurinë Kibernetike (AKSK) dhe Agjencisë për Sigurinë Kibernetike dhe Infrastrukturës së SHBA-së (CISA).
Gjatë takimit, delegacioni i AKSK-së, i kryesuar nga Drejtori i Përgjithshëm, z. Bledar Kazia, diskutoi me përfaqësuesit e CISA-s mbi forcimin e bashkëpunimit operacional, shkëmbimin e informacionit për kërcënimet kibernetike dhe koordinimin në menaxhimin dhe reagimin ndaj incidenteve. Vëmendje e veçantë iu kushtua edhe ngritjes së kapaciteteve përmes trajnimeve të specializuara, ushtrimeve të përbashkëta dhe shkëmbimit të ekspertizës.
AKSK vlerëson partneritetin me CISA-n dhe mbështetjen e vazhdueshme amerikane, duke riafirmuar angazhimin për thellimin e bashkëpunimit dhe zhvillimin e iniciativave të përbashkëta në funksion të forcimit të sigurisë dhe qëndrueshmërisë kibernetike të vendit.