Autoriteti Kombëtar për Sigurinë Kibernetike (AKSK) organizoi sot Konferencën Kombëtare për Sigurinë Kibernetike, një event që mblodhi së bashku ekspertë nga sektorët publik dhe privat, anëtarë të kabinetit qeveritar dhe partnerë ndërkombëtarë për të diskutuar sfidat dhe strategjitë në mbrojtjen e hapësirës digjitale të Shqipërisë.
Në fjalën e tij hapëse, Drejtori i AKSK, z. Igli Tafa, theksoi se siguria kibernetike është bërë një prioritet kombëtar. “Mbrojtja e hapësirës sonë kibernetike është thelbësore për stabilitetin ekonomik dhe social të vendit. Vizioni ynë është të ndërtojmë një sistem të fortë sigurie që të mbështesë zhvillimin e shërbimeve publike të digjitalizuara dhe të sigurojë mbrojtje për të gjithë qytetarët,” deklaroi ai.
Z. Tafa nënvizoi rolin e Shqipërisë në përputhje me standardet evropiane për sigurinë kibernetike, duke përmendur veçanërisht implementimin e direktivës NIS2, një nismë e Bashkimit Evropian që synon mbrojtjen e infrastrukturave kritike. “Jemi një nga katër vendet e para në Evropë që kemi përvetësuar këtë direktivë të rëndësishme, duke zgjeruar fushën e mbrojtjes kibernetike për të përfshirë jo vetëm institucionet, por edhe qytetarët,” theksoi ai. Qasja e institucionit tashmë nuk është vetëm rregullator, por edhe të qenit aktiv në mbrojtjen e infrastrukturave kritike dhe krijiimin e nje ekosistemi kibernetik te sigurt.
Panelet e konferencës trajtuan një sërë temash kyçe për forcimin e sigurisë kibernetike. Diskutimet u fokusuan në mbrojtjen e infrastrukturave kritike, përmirësimin e sigurisë në sektorët e energjisë dhe financave, si dhe në përmirësimin e teknologjive mbrojtëse. Një nga panelet u përqendrua në përfitimet e Shqipërisë nga implementimi i direktivës NIS2 dhe sfidat e zbatimit të saj, ndërsa një tjetër panel theksoi rëndësinë e ndarjes së informacionit mbi kërcënimet kibernetike me partnerët rajonalë për një qasje të koordinuar dhe të unifikuar në rajonin e Ballkanit.
Konferenca trajtoi gjithashtu nevojën për bashkëpunim të ngushtë ndërkombëtar, duke theksuar rëndësinë e koordinimit me partnerët rajonalë dhe globalë për të përballuar sfidat e përbashkëta në fushën e sigurisë kibernetike. “Ne ndajmë informacion mbi kërcënimet kibernetike me vendet e Ballkanit, duke synuar një qasje të integruar për të forcuar sigurinë rajonale,” u shpreh z.Tafa, duke vënë në dukje rolin e Shqipërisë si një aktor aktiv në rritjen e sigurisë digjitale në rajon.
Diskutimet përfshinë gjithashtu temat e përgatitjes së brezave të rinj për sfidat e sigurisë kibernetike dhe përfshirjen e grupeve të margjinalizuara në këtë fushë. Z. Tafa nënvizoi se identifikimi dhe përkrahja e talenteve të reja, përmes bashkëpunimit me universitetet dhe programeve profesionale, janë thelbësore për adresimin e boshllëqeve në tregun e punës dhe për krijimin e një gjenerate të re ekspertësh në sigurinë kibernetike. “Ne duhet të përgatisim të gjithë qytetarët tanë, që nga të rinjtë e deri te komunitetet e margjinalizuara, për t’u përfshirë në mbrojtjen e hapësirës digjitale të vendit,” shtoi ai.
Konferenca u mbyll me një mesazh të qartë: Sigurimi i një të ardhmeje digjitale më të sigurt kërkon përpjekje të përbashkëta dhe investime të vazhdueshme në kapacitete teknologjike dhe njerëzore. AKSK riafirmoi përkushtimin e saj për të qenë një lider rajonal në mbrojtjen kibernetike, duke ndihmuar në ndërtimin e një ekosistemi më të fortë dhe më të sigurt për Shqipërinë dhe rajonin e Ballkanit.
Kjo konferencë u mbështet nga projekti “Qeverisja e mirë e sigurisë kibernetike në Ballkanin Perëndimor,” financuar nga Mbretëria e Bashkuar dhe implementuar nga Qendra e Gjenevës për Qeverisje të Sektorit të Sigurisë – DCAF, dhe nga projekti Risi Albania i Agjencisë Zvicerane për Zhvillim dhe Bashkëpunim (SDC), implementuar nga Helvetas.
