Rreth Nesh

Autoriteti Kombëtar për Sigurinë Kibernetike (AKSK) ka përgjegjësinë e mbikëqyrjes së zbatimit të Ligjit Nr. 25/2024 “Për Sigurinë Kibernetike”, Ligjit Nr.107/2015 “Për Identifikimin Elektronik dhe Shërbimet e Besuara”, Ligjit Nr.9880/2008  “Për Nënshkrimin Elektronik”, si dhe të akteve nënligjore të nxjerra në zbatim të tyre.

Misioni

Arritja e një niveli të lartë të sigurisë kibernetike përfshin përcaktimin e masave të nevojshme të sigurisë, të drejtave dhe detyrimeve të subjekteve, si dhe promovimin e bashkëpunimit të ndërsjellë ndërmjet aktorëve që operojnë në këtë fushë.

Kjo qasje garanton besueshmërinë dhe sigurinë në transaksionet elektronike ndërmjet qytetarëve, bizneseve dhe autoriteteve publike, duke kontribuar në rritjen e efektivitetit të shërbimeve publike dhe private, si dhe tregtisë elektronike. Për më tepër, ajo përcakton standardet minimale teknike për sigurinë e të dhënave dhe rrjeteve/sistemeve të informacionit, në përputhje me standardet ndërkombëtare, me synimin për të krijuar një mjedis elektronik të sigurt dhe të besueshëm.

Synimi

Formimi i një institucioni që garanton sigurinë dhe besueshmërinë e shërbimeve elektronike në Shqipëri, duke zbatuar ligje dhe standarde ndërkombëtare me përpikmëri të plotë. Ky institucion synon të rrisë besimin e përdoruesve në nënshkrimet elektronike, identifikimet elektronike dhe shërbimet e besuara, ndërsa forcon sigurinë e rrjeteve dhe sistemeve të informacionit në nivel kombëtar.

Funksionet e AKSK

1. Autoriteti koordinon veprimtaritë e tij me institucionet e sigurisë dhe të mbrojtjes dhe bashkëpunon me CSIRT-të sektoriale dhe autoritetet ndërkombëtare në fushën e sigurisë kibernetike, nëpërmjet marrëveshjeve të përbashkëta, në përputhje me legjislacionin në fuqi.

2. Përcakton masat e Sigurisë Kibernetike në nivel Kombëtar.

3. Pikë qendrore kontakti në nivel kombëtar për operatorët përgjegjës në fushën e sigurisë kibernetike dhe bashkërendon punën për zgjidhjen e incidenteve të sigurisë kibernetike.

4. Vepron në cilësinë e CSIRT-së kombëtar.

5. Siguron ndihmë dhe mbështetje metodike për operatorët përgjegjës në fushën e sigurisë kibernetike.

6. Kryen aktivitete ndërgjegjësimi dhe edukimi në fushën e sigurisë kibernetike.

7. Regjistron/ akrediton Ofruesin e Shërbimit të Besuar dhe mbikëqyr veprimtarinë e tij.

8. Inspekton metodat e gjenerimit dhe manaxhimit të çelësave publik dhe certifikatave elektronike.

9. Mbikqyr procesin e lëshimit të certifikatave të kualifikuara elektronike dhe implementimin e nënshkrimit elektronik, identifikimin elektronik dhe shërbimet e tjera të besuara.

10. Garanton standardet mbi identifikimin e sigurt të individëve, të cilëve iu lëshohen certifikatat e kualifikuara elektronike.