Përgatitja e profesionistëve të rinj në sigurinë kibernetike kërkon bashkëpunim të vazhdueshëm me shkollat profesionale dhe institucionet arsimore. Për AKSK-në, ky bashkëpunim është pjesë e angazhimit për të zhvilluar kapacitetet njerëzore në këtë fushë, duke nxitur interesin e të rinjve dhe duke lidhur formimin e tyre me nevojat për mbrojtjen e sistemeve dhe shërbimeve digjitale.
Në këtë kuadër, gjatë Future2Tech 2026, Autoriteti Kombëtar për Sigurinë Kibernetike nënshkroi një marrëveshje bashkëpunimi me Shkollën e Mesme Profesionale “Herman Gmeiner”, Institutin “Harry T. Fultz” dhe Shkollën e Mesme Teknike Elektrike “Gjergj Canco”. Ky angazhim e afron më tej arsimin profesional me ekspertizën e AKSK-së dhe me sigurinë kibernetike si fushë ku të rinjtë mund të zhvillojnë aftësitë dhe të ndërtojnë karrierën e tyre.
Pas nënshkrimit, nxënësit e këtyre shkollave morën pjesë në një trajnim për higjienën kibernetike, kushtuar praktikave të përditshme për përdorimin e sigurt të teknologjisë. Edukimi mbi këto praktika përbën një bazë të nevojshme për të rinjtë që përgatiten për profesione ku përgjegjësia për sigurinë e pajisjeve, të dhënave dhe sistemeve është pjesë e punës.
