SiguriaKibernetike Archives - AKSK

AKSK publikon analizën teknike të skedarit keqdashës Lumma Stealer

aksk admin — Wed, 09 Jul 2025 08:15:19 +0000

Autoriteti Kombëtar për Sigurinë Kibernetike (AKSK) ka publikuar një analizë të detajuar teknike për skedarin keqdashës Lumma Stealer, një mjet i kategorisë Infostealer që po përdoret gjerësisht për grumbullimin e të dhënave të ndjeshme nga pajisje të kompromentuara.

Lumma Stealer shpërndahet përmes forumeve të paligjshme në internet si pjesë e modelit Malware-as-a-Service (MaaS) dhe është projektuar për të vjedhur informacion si: kredenciale të shfletuesve, të dhëna nga menaxherët e fjalëkalimeve, kuleta kriptomonedhash, si dhe profile nga aplikacione të njohura si Telegram dhe Discord.

Gjetjet e raportit evidentojnë përdorimin e teknikave të avancuara për shmangien e detektimit, përfshirë:

përdorimin e skripteve AutoIT për fshehjen dhe ekzekutimin e shellcode-it,
injektimin e kodit në procese legjitime të sistemit si chrome.exe,
transmetimin e informacionit të vjedhur përmes një kanali të enkriptuar në platformën Telegram.

Në analizë përfshihen gjithashtu:

indikatorët e komprometimit (IoCs) që ndihmojnë në identifikimin dhe bllokimin e sulmit,
përshkrimi i funksioneve të enkoduara të cilat e bëjnë analizën më të vështirë,
rekomandime konkrete për strukturat që administrojnë sisteme dhe të dhëna kritike.

AKSK vijon të forcojë kapacitetet për zbulimin dhe analizimin e kërcënimeve kibernetike, duke vënë në dispozicion për komunitetin profesional dhe institucionet publike materiale dhe udhëzime që ndihmojnë në përmirësimin e reziliencës digjitale.

Analiza e plotë teknike mund të lexohet në faqen zyrtare të AKSK në linkun më poshtë:

https://aksk.gov.al/analize-per-skedarin-lumma-stealer

Siguria Kibernetike në Zgjerim – AKSK përfshin operatorë të rinj në listën e infrastrukturave kritike dhe të rëndësishme të informacionit

aksk admin — Tue, 08 Jul 2025 07:36:27 +0000

Në kuadër të ligjit “Për sigurinë kibernetike” dhe pas vendimit të Këshillit të Ministrave për miratimin e listës së infrastrukturave kritike dhe të rëndësishme të informacionit, Autoriteti Kombëtar për Sigurinë Kibernetike ka nisur zbatimin e këtij vendimi përmes takimeve me subjektet e përfshira.

Gjatë takimeve të zhvilluara sot, përfaqësuesit e operatorëve u njohën me kuadrin e ri ligjor dhe me rolin e AKSK-së si autoritet mbikëqyrës. U trajtuan çështje që lidhen me detyrimet që burojnë nga përfshirja në listë, përfshirë zbatimin e masave të sigurisë, ngritjen e strukturave të brendshme për menaxhimin e riskut kibernetik dhe procedurat e raportimit të incidenteve.

I pranishëm në këto takime, Drejtori i Përgjithshëm i AKSK-së, z. Igli Tafa, vlerësoi përfshirjen e operatorëve të rinj si një hap thelbësor drejt zgjerimit të mbrojtjes kibernetike në nivel kombëtar dhe theksoi se ndarja e njohurive dhe përvoja e grumbulluar nga Autoriteti ndër vite do të vihet në funksion të operatorëve që i bashkohen këtij sistemi. Sipas tij, bashkëpunimi i ngushtë me çdo subjekt të përfshirë është thelbësor për ndërtimin e një hapësire të sigurt dhe të qëndrueshme digjitale. Ai i cilësoi operatorët e rinj si “ambasadorë të sigurisë kibernetike”, duke nënvizuar rolin e tyre të ri në mbrojtjen e funksioneve kritike që mbështesin jetën institucionale dhe interesin publik.

AKSK do të vijojë të ofrojë mbështetje teknike dhe trajnime të dedikuara për subjektet e përfshira, me qëllim zbatimin efektiv të kërkesave ligjore dhe rritjen e kapaciteteve të brendshme për të përballuar sfidat e vazhdueshme të sigurisë në hapësirën digjitale.

VPN falas? Ja pse kjo zgjedhje mund të jetë e gabuar

aksk admin — Thu, 27 Mar 2025 10:50:35 +0000

Në realitetin digjital të sotëm, ku aplikacionet dhe platformat mund të kufizohen për arsye të ndryshme ligjore apo të sigurisë, shumë përdorues kërkojnë mënyra për të anashkaluar këto barriera. Zgjidhja më e shpejtë për ta duket të jetë një aplikacion VPN falas.

Por ajo që pak e kuptojnë është se, ndërkohë që një VPN falas mund të zhbllokojë një faqe, ai mund të hapë shumë më tepër: derën për abuzim me të dhënat, për ndjekje të fshehtë dhe për rrezik serioz të sigurisë personale.

Çfarë është një VPN dhe si funksionon?

Një VPN (Virtual Private Network) krijon një lidhje të enkriptuar midis pajisjes suaj dhe një serveri në një vend tjetër, duke maskuar adresën tuaj IP dhe aktivitetin tuaj online. Përdoret zakonisht për të rritur privatësinë, për të aksesuar përmbajtje të bllokuar gjeografikisht dhe për të shmangur ndjekjen në rrjet.

Por jo të gjithë VPN-të janë të barabartë. Ndërsa versionet me pagesë ofrojnë shpesh standarde të larta sigurie dhe respekt për privatësinë, shumë VPN falas funksionojnë ndryshe — dhe shpesh në dëm të përdoruesit.

Çfarë e bën një VPN falas të pasigurt?

VPN-të falas nuk janë bamirësi. Ato kanë nevojë për të ardhura për të funksionuar. Dhe në mungesë të pagesës nga përdoruesit, burimi i fitimit bëhet vetë përdoruesi: ti, të dhënat e tua, lëvizjet e tua, zakonet e tua.

Këto janë disa nga rreziqet kryesore të VPN-ve falas:

Mbledhja dhe shitja e të dhënave personale – shumë prej tyre regjistrojnë gjithçka që bëni online dhe e shesin këtë informacion kompanive reklamash apo aktorëve të tjerë, pa dijeninë tuaj.
Mungesë enkriptimi të vërtetë – lidhjet shpesh nuk janë të sigurta, duke i ekspozuar të dhënat ndaj përgjimeve dhe sulmeve.
Injektim i reklamave dhe malware – VPN-të falas mund të futin reklama të padëshiruara në shfletuesin tuaj, dhe në disa raste, edhe viruse që dëmtojnë pajisjen.
Akses i paautorizuar në pajisje – disa VPN falas kanë pasur raste të dokumentuara ku pajisja e përdoruesit është përdorur për të kryer veprime të paligjshme.
Trafikim në serverë të dyshimtë – të dhënat kalojnë nëpër serverë që nuk janë të monitoruar apo të verifikueshëm, shpesh të vendosur në vende me ligje të dobëta për mbrojtjen e privatësisë.

Rreziku nuk është vetëm individual — por edhe kolektiv

Kur përdoruesit bien pre e aplikacioneve të pasigurta, pasojat nuk janë vetëm personale. Të dhënat e tyre mund të përdoren për sulme më të mëdha, për fushata dezinformimi, apo për të krijuar dobësi në sistemet më të gjera të sigurisë. Në rastet kur aplikacione të dyshimta përdoren masivisht, rreziku mund të zgjerohet në nivel kombëtar.

Çfarë rekomandon AKSK?

Autoriteti Kombëtar për Sigurinë Kibernetike u bën thirrje qytetarëve që të mos përdorin VPN falas, për shkak të rrezikut serioz që ato paraqesin për sigurinë dhe privatësinë personale.

Përdorimi i VPN-ve falas është veprim me pasoja. Prandaj rekomandojmë:

Mos shkarkoni dhe mos instaloni aplikacione VPN falas nga burime të panjohura apo jozyrtare.
Shumica prej tyre nuk garantojnë mbrojtje dhe shfrytëzojnë të dhënat tuaja për përfitime të tyre.
Mos i besoni aplikacioneve që premtojnë akses të lirë dhe të pakufizuar.
Shërbimet “falas” shpesh janë mashtrime që synojnë mbledhjen e të dhënave personale.
Mos ndani asnjëherë informacion personal për të aktivizuar një VPN falas.
Kërkesa për regjistrim me email, numër telefoni apo akses në pajisje është një shenjë e qartë rreziku.
Mos përdorni VPN për të anashkaluar kufizime të vendosura për arsye sigurie apo ligjshmërie.
Këto veprime jo vetëm që cënojnë sigurinë tuaj, por mund të kenë pasoja më të gjera.
Mos e sakrifikoni sigurinë personale për akses të përkohshëm.
Asnjë aplikacion apo platformë nuk vlen më shumë se të dhënat dhe privatësia juaj.

Mos lejo që një aplikacion i vogël të hapë një derë të madhe rreziku në jetën tënde digjitale.

VPN falas mund të duket si zgjidhje, por është një kompromis me sigurinë. Në vend që të mbrojnë privatësinë, ato shpesh janë mjeti që e shkelin atë më së shumti.

Trajnim dhe Shkëmbim Eksperiencash për CSIRT-et e Ballkanit Perëndimor në Bashkëpunim me CERT-in e Polonisë

aksk admin — Mon, 10 Feb 2025 08:56:19 +0000

Përfaqësues të ekipeve kombëtare të reagimit ndaj incidenteve kibernetike nga Shqipëria, Kosova dhe Maqedonia e Veriut morën pjesë në një trajnim dhe shkëmbim eksperiencash me CERT-in e Polonisë. Aktiviteti, i organizuar nga DCAF me mbështetjen e GIZ, kishte si synim forcimin e kapaciteteve teknike dhe nxitjen e bashkëpunimit rajonal për përballimin e sfidave kibernetike.

Gjatë sesionit hapës, Drejtori i Autoritetit Kombëtar për Sigurinë Kibernetike, z. Igli Tafa, vlerësoi rëndësinë e bashkëpunimit me partnerë ndërkombëtarë për të rritur aftësitë teknike dhe përmirësuar reagimin ndaj incidenteve kibernetike.

Ai falënderoi DCAF, GIZ dhe CERT-in e Polonisë për mbështetjen dhe mundësinë e shkëmbimit të praktikave më të mira, duke theksuar se iniciativa të tilla ndihmojnë në forcimin e sigurisë kibernetike në nivel kombëtar dhe rajonal.

Si mbështetës i programit, i pranishëm ishte edhe Ambasadori i Gjermanisë në Shqipëri, SH.T.Z. Karl Bergner, i cili vlerësoi progresin e Shqipërisë në këtë fushë dhe nënvizoi rëndësinë e bashkëpunimit rajonal për adresimin e kërcënimeve kibernetike.

Shkëmbimi i eksperiencave mes ekipeve të sigurisë mbetet thelbësor për përmirësimin e mekanizmave të mbrojtjes dhe ndërtimin e një qasjeje të qëndrueshme ndaj sfidave kibernetike në rajon.

#AKSK #SiguriaKibernetike

Prezantohet Platforma SimSpace – Pjesë e trajnimeve të Sigurisë Kibernetike

aksk admin — Thu, 06 Feb 2025 08:23:05 +0000

Ekspertët nga infrastruktura kritike e informacionit dhe institucionet e pavarura morën pjesë në një trajnim të organizuar nga Autoriteti Kombëtar për Sigurinë Kibernetike, ku u prezantua dhe u testua platforma SimSpace.

SimSpace është një platformë e avancuar që mundëson simulimin e sulmeve kibernetike dhe testimin e strategjive të mbrojtjes në një mjedis të kontrolluar. Pjesëmarrësit u angazhuan në një simulim praktik, duke testuar aftësitë e tyre në menaxhimin e incidenteve kibernetike dhe mbrojtjen e sistemeve ndaj kërcënimeve reale.

I pranishëm në aktivitet, Drejtori i Përgjithshëm i AKSK, Igli Tafa, theksoi rëndësinë e trajnimeve të specializuara për sigurinë kibernetike dhe rolin e platformave si SimSpace në rritjen e aftësive të ekspertëve. Ai nënvizoi se kombinimi i SimSpace, Laboratorit të Sigurisë Kibernetike të AKSK dhe mjeteve open-source krijon një ekosistem të plotë trajnimi, duke mbuluar të gjitha aspektet e sigurisë kibernetike.

Ky trajnim është pjesë e angazhimit të AKSK për të rritur kapacitetet profesionale në fushën e sigurisë kibernetike dhe për të mbështetur ekspertët me mjetet dhe platformat më të avancuara.

#SiguriaKibernetike #SimSpace #CyberTraining

Festat e Fundvitit – Takim për Vigjilencë të Shtuar me Infrastrukturat Kritike të Informacionit

admin aksk — Mon, 30 Dec 2024 09:28:40 +0000

Gjatë ditëve të fundit të këtij fundviti, Autoriteti Kombëtar për Sigurinë Kibernetike organizoi disa takime me përfaqësuesit e Infrastruktures Kritike të Informacionit. Qëllimi kryesor i këtyre takimeve ishte diskutimi dhe shkëmbimi i informacionit mbi rreziqet kibernetike që mund të shtohen gjatë periudhës festive, si dhe masat që duhen ndërmarrë për të parandaluar dhe adresuar këto kërcënime.

Këto takime u përqendruan në promovimin e praktikave më të mira, rritjen e vigjilencës dhe forcimin e bashkëpunimit mes institucioneve për të siguruar mbrojtjen e infrastrukturave kritike. Festat janë një moment gëzimi për të gjithë, por siguria kibernetike duhet të mbetet prioritet, për të garantuar një fundvit të sigurt dhe të qetë për çdo qytetar dhe institucion.

AKSK Zhvillon Trajnimin për Sigurinë Kibernetike në Vlorë për Punonjësit e Bashkisë

aksk admin — Mon, 16 Dec 2024 08:18:33 +0000

Në kuadër të trajnimeve të vazhdueshme për forcimin e sigurisë kibernetike në administratat lokale, këtë herë ekspertët tanë të AKSK ishin në Vlorë për një trajnim mbi higjienën kibernetike me punonjësit e kësaj bashkie.

Ky aktivitet kishte për qëllim rritjen e ndërgjegjësimit dhe përmirësimin e aftësive praktike të punonjësve për mbrojtjen e të dhënave dhe përdorimin e sigurt të sistemeve digjitale. Përmes këtyre nismave, synojmë ndërtimin e një administrate publike të aftë për të përballuar sfidat kibernetike të kohës, duke garantuar që të dhënat dhe privatësia e qytetarëve të trajtohen me përgjegjshmërinë dhe sigurinë që ata meritojnë.

Falënderojmë kryetarin z. Ermal Dredha dhe Bashkinë e Vlorës për pritjen dhe mbështetjen e tyre në organizimin e këtij aktiviteti, duke treguar vlerësimin dhe përkushtimin për sigurinë kibernetike si një prioritet i përbashkët për një administratë më të fortë dhe të sigurt.

#CyberHygiene #SiguriaKibernetike #AKSK

Konferenca ndërkombëtare “Formësimi i së Ardhmes së GovTech”, ku Shqipëria mikpret rajonin për të diskutuar revolucionin digjital si fuqi e re e mirëqeverisjes

aksk admin — Wed, 11 Dec 2024 15:16:57 +0000

Në konferencën rajonale “E ardhmja e GovTech”, organizuar nga AKSHI, u riafirmua vizioni i Shqipërisë për avancimin e transformimit digjital dhe sigurisë kibernetike si dy procese të pandashme që ecin krah për krah. Me praninë e Kryeministrit Edi Rama dhe drejtuesve kryesorë nga rajoni, u theksua roli i teknologjisë në modernizimin e qeverisjes, rritjen e transparencës dhe përmirësimin e jetës së qytetarëve.

Drejtori i Autoritetit Kombëtar për Sigurinë Kibernetike, Z. Igli Tafa, nënvizoi rëndësinë e sigurisë kibernetike që ecën paralelisht me transformimin digjital, duke theksuar se Shqipëria ka arritur të ofrojë 1,247 shërbime elektronike. Ai vlerësoi përpjekjet e Agjencisë Kombëtare të Shoqërisë së Informacionit, nën drejtimin e znj. Linda Karçanaj, për ndërtimin e një infrastrukture digjitale të qëndrueshme dhe të besueshme, duke përfshirë teknologji të avancuara si inteligjenca artificiale dhe blockchain.

Konferenca “E ardhmja e GovTech” dëshmoi se Shqipëria jo vetëm që ka bërë hapa të mëdha në transformimin digjital, por edhe po ndërton një model të sigurt dhe inovativ që frymëzon rajonin dhe krijon mundësi për bashkëpunime të reja. Teknologjia dhe siguria po shndërrohen në dy shtyllat kryesore të zhvillimit të qëndrueshëm të vendit.

#GovTech #SiguriaKibernetike #TransformimiDigjital #AKSK #AKSHI

AKSK Zhvillon Trajnime për Sigurinë Kibernetike në Durrës për Punonjësit e Bashkisë dhe Ekspertët e Institucioneve Publike

aksk admin — Wed, 11 Dec 2024 10:20:31 +0000

Në vazhdën e përpjekjeve për të rritur ndërgjegjësimin dhe aftësitë mbi sigurinë kibernetike, Autoriteti Kombëtar për Sigurinë Kibernetike zhvilloi një trajnim 2 ditor në qytetin e Durrësit:

-Cyber Hygiene për punonjësit e Bashkisë Durrës

Ky trajnim u fokusua në praktikat bazë për mbrojtjen ndaj kërcënimeve kibernetike në punën e përditshme të administratës lokale.

-Cyber Drill për ekspertët e institucioneve publike në qarkun Durrës

Ekspertët e institucioneve publike morën pjesë në një trajnim praktik ku simuluan skenarë realë të sulmeve kibernetike dhe mësuan strategji për t’i përballuar ato me efektivitet.

Këto trajnime janë pjesë e një seri aktivitetesh të zhvilluara në qytete të ndryshme të Shqipërisë, me qëllimin për t’u shtrirë në të gjithë vendin dhe për të ndërtuar një mjedis të sigurt digjital për të gjithë.

Siguria kibernetike është përgjegjësi e përbashkët!

#AKSK #CyberHygiene #CyberDrill #SiguriaKibernetike

Zhvillohet Trajnim me temë: “Metodat Kompensuese në Sigurinë Kibernetike me Platforma Open Source”

aksk admin — Tue, 26 Nov 2024 10:18:45 +0000

Autoriteti Kombëtar për Sigurinë Kibernetike zhvilloi një trajnim për stafin e infrastrukturave kritike dhe të rëndësishme të informacionit, si dhe për institucionet e pavarura, duke u fokusuar në rritjen e kapaciteteve teknike përmes përdorimit të teknologjive open-source në mbrojtjen kibernetike.

Ky trajnim shkon përtej simulimeve të zakonshme post-incident, duke prezantuar mënyra praktike për implementimin e mjeteve open-source në mbrojtjen e rrjeteve dhe sistemeve. Duke ofruar zgjidhje alternative aty ku buxhetet e kufizuara e bëjnë të pamundur përdorimin e platformave komerciale, trajnimi kishte si synim fuqizimin e institucioneve me një mbrojtje kibernetike të qëndrueshme dhe efektive, duke u bazuar në qasjet më inovative të teknologjisë së hapur.

#SiguriaKibernetike #OpenSource #AKSK