Higjiena Kibernetike Archives - AKSK

Zhvillohet takim ndërgjegjësues mbi sigurinë digjitale për nxënësit e Shkollës Artistike “Jorndan Misja”

aksk admin — Fri, 09 Jan 2026 12:56:58 +0000

Në vijim të aktiviteteve ndërgjegjësuese në institucionet arsimore, u zhvillua këtë herë një takim informues me nxënësit e Shkollës Artistike “Jordan Misja”, në bashkëpunim me Agjencinë Shtetërore për të Drejtat dhe Mbrojtjen e Fëmijës (ASHDMF), me fokus rritjen e ndërgjegjësimit mbi sigurinë në hapësirën digjitale.

Gjatë bashkëbisedimit u trajtuan rreziqet më të shpeshta online që prekin të rinjtë, mbrojtja e të dhënave personale, sjellja e përgjegjshme në rrjetet sociale si dhe ndikimi i mjedisit digjital në jetën dhe krijimtarinë e tyre.

Këto takime synojnë të forcojnë kulturën e sigurisë digjitale që në moshë të hershme dhe të nxisin përdorimin e sigurt e të ndërgjegjshëm të teknologjisë, në kuadër të angazhimit të vazhdueshëm për informim dhe ndërgjegjësim në shkolla.

Siguria Digjitale për Të Gjithë – Ndërgjegjësim për Fëmijët me Nevoja të Veçanta dhe Prindërit e Tyre

aksk admin — Thu, 17 Jul 2025 14:12:02 +0000

Në kuadër të nismës për përfshirjen dhe edukimin digjital të grupeve të nënpërfaqësuara, u zhvillua një tjetër sesion ndërgjegjësues mbi sigurinë në internet me fëmijët me nevoja të veçanta dhe prindërit e tyre.

Gjatë takimit u diskutuan mënyrat e përdorimit të sigurt të teknologjisë, rreziqet online dhe mbrojtja e të dhënave personale në përditshmëri.

Ashtu si në aktivitetet e mëparshme, pjesë e trajnimit ishte edhe Luani – pjesë e komunitetit të tyre, i cili është tashmë ambasador i sigurisë digjitale dhe kontribuon me pasion e profesionalizëm në trajnimin e këtyre grupeve.

Ky aktivitet u realizua me mbështetjen e One Albania dhe në bashkëpunim me shoqatën MEDPAK.

Siguria Kibernetike në Zgjerim – AKSK përfshin operatorë të rinj në listën e infrastrukturave kritike dhe të rëndësishme të informacionit

aksk admin — Tue, 08 Jul 2025 07:36:27 +0000

Në kuadër të ligjit “Për sigurinë kibernetike” dhe pas vendimit të Këshillit të Ministrave për miratimin e listës së infrastrukturave kritike dhe të rëndësishme të informacionit, Autoriteti Kombëtar për Sigurinë Kibernetike ka nisur zbatimin e këtij vendimi përmes takimeve me subjektet e përfshira.

Gjatë takimeve të zhvilluara sot, përfaqësuesit e operatorëve u njohën me kuadrin e ri ligjor dhe me rolin e AKSK-së si autoritet mbikëqyrës. U trajtuan çështje që lidhen me detyrimet që burojnë nga përfshirja në listë, përfshirë zbatimin e masave të sigurisë, ngritjen e strukturave të brendshme për menaxhimin e riskut kibernetik dhe procedurat e raportimit të incidenteve.

I pranishëm në këto takime, Drejtori i Përgjithshëm i AKSK-së, z. Igli Tafa, vlerësoi përfshirjen e operatorëve të rinj si një hap thelbësor drejt zgjerimit të mbrojtjes kibernetike në nivel kombëtar dhe theksoi se ndarja e njohurive dhe përvoja e grumbulluar nga Autoriteti ndër vite do të vihet në funksion të operatorëve që i bashkohen këtij sistemi. Sipas tij, bashkëpunimi i ngushtë me çdo subjekt të përfshirë është thelbësor për ndërtimin e një hapësire të sigurt dhe të qëndrueshme digjitale. Ai i cilësoi operatorët e rinj si “ambasadorë të sigurisë kibernetike”, duke nënvizuar rolin e tyre të ri në mbrojtjen e funksioneve kritike që mbështesin jetën institucionale dhe interesin publik.

AKSK do të vijojë të ofrojë mbështetje teknike dhe trajnime të dedikuara për subjektet e përfshira, me qëllim zbatimin efektiv të kërkesave ligjore dhe rritjen e kapaciteteve të brendshme për të përballuar sfidat e vazhdueshme të sigurisë në hapësirën digjitale.

AKSK Zhvillon Trajnimin për Sigurinë Kibernetike në Vlorë për Punonjësit e Bashkisë

aksk admin — Mon, 16 Dec 2024 08:18:33 +0000

Në kuadër të trajnimeve të vazhdueshme për forcimin e sigurisë kibernetike në administratat lokale, këtë herë ekspertët tanë të AKSK ishin në Vlorë për një trajnim mbi higjienën kibernetike me punonjësit e kësaj bashkie.

Ky aktivitet kishte për qëllim rritjen e ndërgjegjësimit dhe përmirësimin e aftësive praktike të punonjësve për mbrojtjen e të dhënave dhe përdorimin e sigurt të sistemeve digjitale. Përmes këtyre nismave, synojmë ndërtimin e një administrate publike të aftë për të përballuar sfidat kibernetike të kohës, duke garantuar që të dhënat dhe privatësia e qytetarëve të trajtohen me përgjegjshmërinë dhe sigurinë që ata meritojnë.

Falënderojmë kryetarin z. Ermal Dredha dhe Bashkinë e Vlorës për pritjen dhe mbështetjen e tyre në organizimin e këtij aktiviteti, duke treguar vlerësimin dhe përkushtimin për sigurinë kibernetike si një prioritet i përbashkët për një administratë më të fortë dhe të sigurt.

#CyberHygiene #SiguriaKibernetike #AKSK

Trajnim ndërgjegjësues mbi higjienën kibernetike

aksk admin — Wed, 25 Sep 2024 06:31:53 +0000

Shkodra u bë një tjetër qendër e rëndësishme për sigurinë kibernetike, me zhvillimin e një trajnimi mbi Higjienën Kibernetike nga Autoriteti Kombëtar për Sigurinë Kibernetike (AKSK), në bashkëpunim me CRDF Global dhe mbështetjen e Departamentit Amerikan të Shtetit. Eventi tërhoqi 723 pjesëmarrës, duke përfshirë pjesëmarrës në sallë dhe online, nga administrata publike dhe qytetarë të thjeshtë.

Trajnimi synoi rritjen e ndërgjegjësimit për rreziqet digjitale dhe përmirësimin e aftësive për mbrojtjen nga sulmet kibernetike, duke u fokusuar në teknikat kryesore për mbrojtjen e sistemeve dhe të dhënave. Pjesëmarrësit u informuan gjithashtu mbi rëndësinë e higjienës kibernetike në jetën e përditshme, duke minimizuar rreziqet nga gabimet njerëzore, që shkaktojnë mbi 70% të incidenteve kibernetike.

Ky trajnim është pjesë e një nisme kombëtare të AKSK-së, që deri më tani ka përfshirë mbi 2400 pjesëmarrës në trajnime të zhvilluara në Tiranë dhe Vlorë, me 1600 prej tyre të certifikuar. Pas suksesit në Shkodër, trajnimet do të vazhdojnë në Korçë, me synimin për të zgjeruar më tej ndërgjegjësimin për sigurinë kibernetike në të gjithë vendin.