CyberSecurity Archives - AKSK

Cyber Drill në UAMD, studentët testojnë aftësitë në sigurinë kibernetie

aksk admin — Tue, 19 May 2026 11:25:21 +0000

Në kuadër të forcimit të kapaciteteve në fushën e sigurisë kibernetike dhe rritjes së aftësive praktike të studentëve, Autoriteti Kombëtar për Sigurinë Kibernetike (AKSK), në bashkëpunim me Fakultetin e Teknologjisë së Informacionit, Universiteti “Aleksandër Moisiu” Durrës, zhvilloi një aktivitet praktik “Cyber Drill”, i fokusuar në simulimin e situatave reale kibernetike dhe reagimin ndaj incidenteve të sigurisë.

Gjatë aktivitetit, studentët dhe stafi akademik u angazhuan me mbështetjen e ekspertëve të AKSK-së, në ushtrime praktike dhe skenarë interaktivë, duke testuar aftësitë e tyre në analizimin, identifikimin dhe menaxhimin e kërcënimeve kibernetike. Ky bashkëpunim synon të afrojë më tej studentët me praktikat reale të sigurisë kibernetike dhe të kontribuojë në zhvillimin e brezit të ri të talenteve në këtë fushë.

Masat e sigurisë kibernetike gjatë festave, në fokus të takimeve koordinuese me infrastrukturat

aksk admin — Wed, 24 Dec 2025 13:29:58 +0000

Autoriteti Kombëtar për Sigurinë Kibernetike zhvilloi një seri takimesh koordinuese me përfaqësues të infrastrukturave kritike dhe të rëndësishme të informacionit, me fokus forcimin e gatishmërisë dhe koordinimit përballë rreziqeve të shtuara kibernetike gjatë periudhës së festave të fundvitit.

Gjatë takimeve u theksua se periudha festive karakterizohet nga një rritje e ndjeshme e kërcënimeve kibernetike, për shkak të volumit të shtuar të aktiviteteve online. Në këtë kontekst, diskutimet u përqendruan në masat e menjëhershme për monitorim të shtuar të sistemeve, reagim të shpejtë ndaj incidenteve dhe forcim të mekanizmave të shkëmbimit të informacionit në kohë reale.

Një vëmendje e veçantë iu kushtua ndërgjegjësimit të stafit dhe rritjes së gatishmërisë operacionale gjatë kësaj periudhe, si elementë kyç për parandalimin dhe menaxhimin efektiv të incidenteve kibernetike. Paralelisht, u diskutuan edhe drejtimet kryesore të planit afatmesëm për vitin në vijim, i orientuar drejt forcimit të kapaciteteve institucionale përmes trajnimeve të specializuara dhe rritjes së qëndrueshmërisë kibernetike në nivel kombëtar.

Këto takime përbëjnë një hap konkret në përforcimin e bashkëpunimit dhe koordinimit mes aktorëve kryesorë, me qëllim garantimin e sigurisë dhe vazhdimësisë së shërbimeve kritike gjatë festave të fundvitit dhe përgjatë vitit në vijim.

Ballkani Perëndimor bashkohet në Tiranë për dialogun rajonal mbi sigurinë kibernetike

aksk admin — Mon, 20 Oct 2025 12:08:43 +0000

Autoriteti Kombëtar për Sigurinë Kibernetike (AKSK) dhe Ministria e Punëve të Jashtme e Mbretërisë së Hollandës, në bashkëpunim me Observer Research Foundation America dhe Albania Sustainable Development Organization, organizuan në Tiranë një dialog rajonal mbi politikat e sigurisë kibernetike.

Ky aktivitet mblodhi 50 pjesëmarrës nga qeveria, biznesi dhe shoqëria civile nga gjashtë vendet e Ballkanit Perëndimor. Agjenda e takimit trajtoi mënyrat për të përmirësuar bashkëpunimin rajonal në mbrojtjen kibernetike, reagimin ndaj incidenteve, diplomacinë kibernetike dhe ngritjen e kapaciteteve.

Drejtori i Përgjithshëm i AKSK, z. Igli Tafa, u shpreh: “Ende ekziston një hendek i ndjeshëm në fushën e sigurisë kibernetike në të gjithë Ballkanin Perëndimor. Sfida të tilla nuk mund të përballohen të vetëm, por vetëm përmes bashkëpunimit dhe ndërtimit të përbashkët të kapaciteteve mund të ecim përpara.”

Ernst Noorman, Ambasador i Posaçëm për Çështjet e Sigurisë Kibernetike në Ministrinë e Punëve të Jashtme të Mbretërisë së Hollandës, theksoi:
“Siguria kibernetike kërkon përfshirje të shumë aktorëve, nuk është vetëm çështje qeveritare, por përfshin gjithë shoqërinë. Me digjitalizimin që sjell efikasitet, sfidat bëhen gjithnjë e më komplekse. Veprimi i koordinuar dhe besimi i ndërsjellë janë thelbësorë nëse duam të ecim përpara së bashku.”

Ky dialog ndërtohet mbi rezultatet e takimeve të mëparshme të zhvilluara në Tiranë në nëntor 2024 dhe në Shkup, Maqedonia e Veriut, në qershor 2022 dhe shtator 2023.

AKSK zhvillon trajnim për forcimin e kapaciteteve në sigurinë kibernetike

aksk admin — Mon, 20 Oct 2025 09:48:19 +0000

Autoriteti Kombëtar për Sigurinë Kibernetike zhvilloi një trajnim të dedikuar për stafin e infrastrukturave kritike dhe të rëndësishme të informacionit, me qëllim forcimin e kapaciteteve teknike dhe rritjen e ndërgjegjësimit në fushën e sigurisë kibernetike. Aktiviteti, i mbajtur në ambientet e Autoritetit, u fokusua në aftësimin e pjesëmarrësve për të reaguar në mënyrë efektive ndaj incidenteve kibernetike dhe për të zbatuar masa parandaluese në infrastrukturat e tyre.

Gjatë trajnimit, ekspertët e AKSK ndanë njohuri praktike dhe raste konkrete mbi menaxhimin e incidenteve, vlerësimin e rreziqeve dhe identifikimin e kërcënimeve të mundshme, duke theksuar rëndësinë e ndërtimit të një kulture të qëndrueshme të sigurisë digjitale në çdo institucion. Ky trajnim është pjesë e një programi të vazhdueshëm të Autoritetit që synon përgatitjen e vazhdueshme të profesionistëve të IT dhe sigurisë kibernetike, për të përforcuar mbrojtjen e infrastrukturave të rëndësishme të informacionit në vend.

Hapet thirrja për përfaqësimin e Shqipërisë në European Cyber Security Challenge 2025

aksk admin — Fri, 25 Jul 2025 12:14:22 +0000

Autoriteti Kombëtar për Sigurinë Kibernetike (AKSK) shpall hapjen e thirrjes për përzgjedhjen e ekipit shqiptar që do të përfaqësojë Shqipërinë në European Cyber Security Challenge (ECSC) 2025, një nga garat më të rëndësishme evropiane në fushën e sigurisë kibernetike për të rinjtë.

Këtë vit, gara do të zhvillohet nga 6 deri më 10 tetor 2025, në Varshavë, Poloni, dhe organizohet nga ENISA – Agjencia e Bashkimit Evropian për Sigurinë Kibernetike.

ECSC synon të identifikojë dhe promovojë talentet e reja në fushën e sigurisë kibernetike, duke i vënë përballë sfidave praktike me ekipe nga mbi 40 vende pjesëmarrëse.

Kush mund të aplikojë?

Të gjithë të rinjtë e moshës 14–24 vjeç, të apasionuar pas teknologjisë dhe sigurisë digjitale, të cilët dëshirojnë të testojnë aftësitë e tyre dhe të përfaqësojnë Shqipërinë në një platformë ndërkombëtare të nivelit të lartë.

Çfarë përfshin gara?

Pjesëmarrësit do të përballen me sfida teknike në fusha si:

Siguria e faqeve dhe shërbimeve web
Siguria e aplikacioneve mobile
Kriptografi
Reverse engineering
Fforensics

Në përfundim të procesit të përzgjedhjes, 10 të rinj do të përbëjnë ekipin përfaqësues të Shqipërisë në këtë garë.

Si të aplikoni?

Të interesuarit mund të plotësojnë formularin e aplikimit këtu.

Për më shumë informacion mbi garën ndërkombëtare: www.ecsc.e

AKSK mirëpret delegacionin nga institucionet përgjegjëse për sigurinë kibernetike të Kosovës

aksk admin — Fri, 25 Jul 2025 10:54:50 +0000

Në vijim të angazhimeve për forcimin e bashkëpunimit rajonal dhe ndërtimin e marrëdhënieve të qëndrueshme ndërinstitucionale në fushën e sigurisë kibernetike, Autoriteti Kombëtar për Sigurinë Kibernetike mirëpriti sot një delegacion nga institucionet homologe të Republikës së Kosovës.

Delegacioni, i kryesuar nga Z. Lulëzon Jagxhiu, Këshilltar për Teknologjinë e Informacionit pranë Zyrës së Kryeministrit të Kosovës, përfshinte përfaqësues nga institucionet përgjegjëse për mbrojtjen kibernetike dhe transformimin digjital. Vizita u fokusua në prezantimin e veprimtarisë së AKSK, kuadrit ligjor dhe rregullator, strukturës funksionale dhe kapaciteteve operacionale, përfshirë proceset e monitorimit dhe reagimit ndaj incidenteve, mekanizmat e koordinimit ndërinstitucional dhe bashkëpunimin me aktorët e tjerë në vend.

Në fjalën e tij, Drejtori i Përgjithshëm i AKSK, z. Igli Tafa, theksoi se ndërtimi i një partneriteti me institucionet homologe të Kosovës është pjesë e vizionit të qeverisë për rritjen e qëndrueshmërisë kibernetike në nivel rajonal. Ai u shpreh se shkëmbimi i praktikave dhe përvojave konkrete është thelbësore për të adresuar sfidat gjithnjë në zhvillim të hapësirës digjitale.

Vizita konfirmoi angazhimin e ndërsjellë për të ndërtuar ura bashkëpunimi midis Shqipërisë dhe Kosovës për sigurinë kibernetike, në funksion të një objektivi të përbashkët për mbrojtjen e hapësirës sonë digjitale dhe forcimin e qëndrueshmërisë kibernetike në nivel kombëtar dhe rajonal.

Njoftim i Rëndësishëm: Cenueshmëri kritike në produktin Microsoft SharePoint

aksk admin — Wed, 23 Jul 2025 09:08:12 +0000

Autoriteti Kombëtar për Sigurinë Kibernetike (AKSK) njofton të gjitha infrastrukturat kritike dhe të rëndësishme të informacionit për identifikimin e një cenueshmërie kritike në produktin Microsoft SharePoint, CVE-2025-53770.

Kjo cenueshmëri është një variant i avancuar i CVE-2025-49706 dhe mundëson ekzekutim të komandave në distancë (RCE) pa nevojë për autentikim, duke u dhënë aktorëve keqdashës akses të plotë në përmbajtjen e SharePoint, përfshirë edhe skedarët e konfigurimeve. Ky aktivitet keqdashës njihet me emrin “ToolShell”.

AKSK rekomandon:

1. Aplikoni menjëherë përditësimet zyrtare të sigurisë:

SharePoint Subscription Edition: KB5002768
SharePoint 2019: KB5002754
SharePoint 2016: KB5002760

2. Monitoroni aktivitetin e serverit SharePoint:

Kontrolloni për kërkesa HTTP POST
/ _layouts/15/ToolPane.aspx?DisplayMode=Edit

3. Kontrolloni nëse ndonjë prej sistemeve tuaja ka komunikuar me këto IP dhe lutemi në bllokimin e tyre:

107[.]191[.]58[.]76
104[.]238[.]159[.]149
96[.]9[.]125[.]147

4. Kufizoni aksesin në SharePoint nga interneti:

Aktivizoni akses vetëm përmes VPN.

Në rast të ndonjë evidence apo dyshim për sulm ose incident, raportoni menjëherë për një përgjigje të shpejtë dhe të koordinuar.

Siguria Digjitale për Të Gjithë – Ndërgjegjësim për Fëmijët me Nevoja të Veçanta dhe Prindërit e Tyre

aksk admin — Thu, 17 Jul 2025 14:12:02 +0000

Në kuadër të nismës për përfshirjen dhe edukimin digjital të grupeve të nënpërfaqësuara, u zhvillua një tjetër sesion ndërgjegjësues mbi sigurinë në internet me fëmijët me nevoja të veçanta dhe prindërit e tyre.

Gjatë takimit u diskutuan mënyrat e përdorimit të sigurt të teknologjisë, rreziqet online dhe mbrojtja e të dhënave personale në përditshmëri.

Ashtu si në aktivitetet e mëparshme, pjesë e trajnimit ishte edhe Luani – pjesë e komunitetit të tyre, i cili është tashmë ambasador i sigurisë digjitale dhe kontribuon me pasion e profesionalizëm në trajnimin e këtyre grupeve.

Ky aktivitet u realizua me mbështetjen e One Albania dhe në bashkëpunim me shoqatën MEDPAK.

Pse Bashkimi Europian duhet ta integrojë Ballkanin Perëndimor në Agjencinë e tij për Sigurinë Kibernetike?

aksk admin — Mon, 14 Jul 2025 11:26:05 +0000

Po jetojmë në një periudhë të karakterizuar nga cenueshmëria digjitale dhe paqëndrueshmëria gjeopolitike. Në këtë kontekst, siguria kibernetike nuk është më thjesht çështje e qëndrueshmërisë kombëtare, por përbën një dimension thelbësor të procesit të integrimit europian në rajonin tonë. Për gjashtë vendet e Ballkanit Perëndimor (WB6), domosdoshmëria për t’u përafruar me kuadrin e Bashkimit Europian për sigurinë kibernetike nuk është thjesht teknike – është ekzistenciale.

Gjatë këtij viti, organizuam tryeza politike në Tiranë, Berlin dhe Bruksel për të diskutuar se si Ballkani Perëndimor mund të afrohet më shumë me mekanizmat dhe politikat e BE-së për sigurinë kibernetike. Në secilën prej këtyre tryezave, pjesëmarrësit shprehën një thirrje të përbashkët drejtuar Bashkimit Europian: të ndërmarrë një hap të guximshëm dhe strategjik – të mundësojë integrimin e fazuar të WB6 në Agjencinë e Bashkimit Europian për Sigurinë Kibernetike (ENISA). Ky proces duhet të nisë me dhënien e statusit të vëzhguesit dhe me zhvillimin e një harte të qartë drejt anëtarësimit të plotë.

BE-ja e ka pranuar tashmë se tranzicioni digjital është në zemër të së ardhmes së saj. Përmes nismave si “Growth Facility” për Ballkanin Perëndimor, është theksuar se qëndrueshmëria digjitale e rajonit është kyçe për konvergjencën me BE-në. Por, ndonëse retorika e njeh sfidën digjitale, instrumentet e integrimit në fushën e sigurisë kibernetike duhet të jenë të hapura për vendet kandidate. ENISA, si aktor kritik në mbrojtjen e infrastrukturës digjitale të BE-së, aktualisht nuk ofron një rrugë formale për pjesëmarrjen e WB6, përveç bashkëpunimit me vende të treta. Kjo nuk do të thotë se nuk ka bashkëpunim mes ENISA-s dhe vendeve të WB6; përkundrazi, drejtuesit e ENISA kanë qenë shumë aktivë në mbështetjen e rajonit. Megjithatë, kjo marrëdhënie duhet thelluar. Duke qenë se BE-ja po kërkon ide për avancimin e integrimit gradual, ENISA është opsioni i duhur – është logjike dhe me përfitim të ndërsjellë.

Një mundësi e rëndësishme ndodhet aktualisht në tryezë: Komisioni Europian po rishikon Aktin e Sigurisë Kibernetike të BE-së, i cili përcakton mandatin, fushëveprimin dhe strukturën e ENISA-s. Ky është momenti i duhur për të përfshirë dispozita ligjore që mundësojnë dhënien e statusit të vëzhguesit për vendet kandidate. Një ndryshim i tillë jo vetëm që do të pasqyronte realitetin gjeopolitik të zgjerimit, por gjithashtu do t’i jepte WB6 mundësinë të kontribuojë në qëndrueshmërinë kibernetike të Europës – që tani, jo vetëm pas anëtarësimit.

Ballkani Perëndimor nuk ndodhet në periferi të digjitalizimit europian – është në zemër të tij. Incidentet kibernetike në një pjesë të Europës nuk janë kurrë thjesht lokale. Sulmet kibernetike të vitit 2022 ndaj Shqipërisë ishin një alarm për të gjithë rajonin, duke treguar se aktorët keqdashës përfitojnë nga boshllëqet institucionale dhe cenueshmëritë rajonale. Fragmentimi i kapaciteteve në fushën e sigurisë kibernetike në WB6 rrit ekspozimin e gjithë kontinentit.

Ajo që rajoni ka nevojë sot është integrimi operacional. Sa i përket marrëdhënieve të avancuara me ENISA dhe statusit të vëzhguesit, kjo do të thotë pjesëmarrje në rrjetet e njohurive të ENISA-s, kontribut në kornizën e certifikimit dhe përafrim me standardet e saj për përgjigje ndaj incidenteve. Integrimi i fazuar në ENISA është mënyra më efektive për të forcuar dhe zhvilluar kapacitetin e rajonit për të parandaluar, zbuluar dhe për t’u përgjigjur ndaj kërcënimeve kibernetike, duke promovuar në të njëjtën kohë konvergjencën ligjore dhe institucionale me normat e BE-së. Udhëheqësit e BE-së dhe vendeve anëtare kanë shprehur mbështetje për integrimin gradual – dhe në këtë kontekst, ENISA është zgjedhja më e logjikshme.

Vendet e rajonit janë të gatshme. Shumica prej tyre kanë krijuar tashmë agjenci kombëtare për sigurinë kibernetike dhe kanë miratuar strategji të përafruara me Direktivën për Sigurinë e Rrjeteve dhe Informacionit (NIS) të BE-së. Por përafrimi me Aktin për Sigurinë Kibernetike të BE-së dhe pjesëmarrja e kuptimplotë në punën e ENISA-s kërkon më shumë sesa reforma të brendshme – kërkon akses.

Ne propozojmë një qasje në tre faza:

1. BE-ja duhet të ndryshojë Aktin e Sigurisë Kibernetike për të lejuar dhënien e statusit të vëzhguesit për vendet e WB6 që plotësojnë kriteret bazë ligjore dhe institucionale – një model që tashmë ekziston për vendet e EEA si Norvegjia dhe Islanda.

2. ENISA dhe Komisioni Europian duhet të kryejnë vlerësime të fizibilitetit dhe të ofrojnë mbështetje teknike për të ndihmuar WB6-në të arrijë standardet e nevojshme.

3. Duhet të hartohet një plan i qartë drejt anëtarësimit të plotë, i lidhur me përparimin e secilit vend në procesin e anëtarësimit në BE dhe përafrimin me standardet e ENISA-s.

Në kuadër të nismës IGNITA, të mbështetur nga Fondacionet e Shoqërisë së Hapur – Ballkani Perëndimor, Qendra Kosovare për Studime të Sigurisë (QKSS) ka publikuar një dokument politik mbi ENISA-n, ku paraqitet në detaje kjo hartë rruge, gjendja aktuale në WB6 për sa i përket sigurisë kibernetike, hapat që duhen ndërmarrë për të qenë të gatshëm për statusin e vëzhguesit, si dhe argumentet pse ky status duhet të mundësohet.

Ky integrim duhet të jetë i barabartë në të gjithë rajonin. Marrëveshjet bilaterale të fragmentuara do të përforconin pabarazitë ekzistuese. Në vend të kësaj, BE-ja duhet të ndjekë një qasje koherente rajonale, duke ndërtuar mbi dinamikën e Procesit të Berlinit dhe prioritetet e përbashkëta të identifikuara në kuadrin e Reformës dhe Mekanizmit të Rritjes. Konkluzionet e udhëheqësve nga Samiti i Procesit të Berlinit në Tiranë në vitin 2023 mbështesin integrimin e Ballkanit Perëndimor në kuadrot e sigurisë kibernetike të BE-së.

Nga këndvështrimi i BE-së, integrimi i fazuar i WB6 në ENISA do të përforconte konkretësinë e angazhimit për zgjerim. Do të ishte gjithashtu një hap praktik drejt rritjes së qëndrueshmërisë, duke ulur sipërfaqen e rrezikut të Tregut Unik Digjital të Europës. Siguria kibernetike është nga natyra e saj transnacionale – prandaj edhe qeverisja e saj duhet të jetë e tillë.

Për ta bërë të qartë: nuk po kërkojmë rrugë të shkurtuara. Integrimi në ENISA duhet të fitohet përmes reformave dhe përafrimit me normat e BE-së. Por, BE-ja nga ana e saj duhet të hapë derën dhe të tregojë se përputhshmëria do të shpërblehet me pjesëmarrje.

Për WB6, bashkimi me ENISA-n do të institucionalizonte bashkëpunimin, do të përforconte një kulturë të standardeve dhe do të nxitë llogaridhënie të ndërsjellë në një fushë ku margjinat për gabime janë gjithnjë e më të vogla. Gjithashtu, do të dërgonte një mesazh të fortë për qytetarët e rajonit tonë: integrimi europian po ndodh, në sektorë konkretë, është i prekshëm dhe është një proces i gjallë që jep rezultate.

Ndërsa Komisioni Europian shtyn përpara zbatimin e Reformës dhe Mekanizmit të Rritjes dhe rishikon Aktin e Sigurisë Kibernetike, momenti për të vepruar është tani. Integrimi në fushën e sigurisë kibernetike për Ballkanin Perëndimor duhet të nisë me ura institucionale. ENISA është pika ideale e nisjes.

*Ky artikull është material i publikuar në European Western Balkans, opinion nga Dr Igli Tafa dhe Mentor Vrajolli: https://europeanwesternbalkans.com/2025/07/11/53121/

Webinar i ri nga AKSK: “Qeverisja dhe standardet e sigurisë kibernetike”

aksk admin — Thu, 10 Jul 2025 10:14:44 +0000

Autoriteti Kombëtar për Sigurinë Kibernetike ju fton të bëheni pjesë e webinarit informues mbi qeverisjen, rreziqet dhe standardet në fushën e sigurisë kibernetike.

Çfarë do të mësoni:
Cilat janë strategjitë për të menaxhuar qeverisjen dhe rreziqet e sigurisë kibernetike?
Cilat janë standardet kryesore në menaxhimin e sigurisë së informacionit dhe roli i tyre në ruajtjen e sigurisë?
Cilat janë hapat për zbatimin efektiv të një kuadri Governance, Risk and Compliance (GRC) duke përfshirë vlerësimin e rrezikut, zhvillimin e politikave dhe trajnimin e punonjësve?

I përshtatshëm për profesionistë të IT-së, përgjegjës për sigurinë e informacionit, apo këdo që dëshiron të kuptojë më mirë strukturat e qeverisjes në kibernetikë.

17 Korrik 2025
Ora: 15:00 – 16:00
Trajnues: Sonila Agako

Regjistrohu këtu!