BE Archives - AKSK

Hapet thirrja për përfaqësimin e Shqipërisë në European Cyber Security Challenge 2025

aksk admin — Fri, 25 Jul 2025 12:14:22 +0000

Autoriteti Kombëtar për Sigurinë Kibernetike (AKSK) shpall hapjen e thirrjes për përzgjedhjen e ekipit shqiptar që do të përfaqësojë Shqipërinë në European Cyber Security Challenge (ECSC) 2025, një nga garat më të rëndësishme evropiane në fushën e sigurisë kibernetike për të rinjtë.

Këtë vit, gara do të zhvillohet nga 6 deri më 10 tetor 2025, në Varshavë, Poloni, dhe organizohet nga ENISA – Agjencia e Bashkimit Evropian për Sigurinë Kibernetike.

ECSC synon të identifikojë dhe promovojë talentet e reja në fushën e sigurisë kibernetike, duke i vënë përballë sfidave praktike me ekipe nga mbi 40 vende pjesëmarrëse.

Kush mund të aplikojë?

Të gjithë të rinjtë e moshës 14–24 vjeç, të apasionuar pas teknologjisë dhe sigurisë digjitale, të cilët dëshirojnë të testojnë aftësitë e tyre dhe të përfaqësojnë Shqipërinë në një platformë ndërkombëtare të nivelit të lartë.

Çfarë përfshin gara?

Pjesëmarrësit do të përballen me sfida teknike në fusha si:

Siguria e faqeve dhe shërbimeve web
Siguria e aplikacioneve mobile
Kriptografi
Reverse engineering
Fforensics

Në përfundim të procesit të përzgjedhjes, 10 të rinj do të përbëjnë ekipin përfaqësues të Shqipërisë në këtë garë.

Si të aplikoni?

Të interesuarit mund të plotësojnë formularin e aplikimit këtu.

Për më shumë informacion mbi garën ndërkombëtare: www.ecsc.e

Pse Bashkimi Europian duhet ta integrojë Ballkanin Perëndimor në Agjencinë e tij për Sigurinë Kibernetike?

aksk admin — Mon, 14 Jul 2025 11:26:05 +0000

Po jetojmë në një periudhë të karakterizuar nga cenueshmëria digjitale dhe paqëndrueshmëria gjeopolitike. Në këtë kontekst, siguria kibernetike nuk është më thjesht çështje e qëndrueshmërisë kombëtare, por përbën një dimension thelbësor të procesit të integrimit europian në rajonin tonë. Për gjashtë vendet e Ballkanit Perëndimor (WB6), domosdoshmëria për t’u përafruar me kuadrin e Bashkimit Europian për sigurinë kibernetike nuk është thjesht teknike – është ekzistenciale.

Gjatë këtij viti, organizuam tryeza politike në Tiranë, Berlin dhe Bruksel për të diskutuar se si Ballkani Perëndimor mund të afrohet më shumë me mekanizmat dhe politikat e BE-së për sigurinë kibernetike. Në secilën prej këtyre tryezave, pjesëmarrësit shprehën një thirrje të përbashkët drejtuar Bashkimit Europian: të ndërmarrë një hap të guximshëm dhe strategjik – të mundësojë integrimin e fazuar të WB6 në Agjencinë e Bashkimit Europian për Sigurinë Kibernetike (ENISA). Ky proces duhet të nisë me dhënien e statusit të vëzhguesit dhe me zhvillimin e një harte të qartë drejt anëtarësimit të plotë.

BE-ja e ka pranuar tashmë se tranzicioni digjital është në zemër të së ardhmes së saj. Përmes nismave si “Growth Facility” për Ballkanin Perëndimor, është theksuar se qëndrueshmëria digjitale e rajonit është kyçe për konvergjencën me BE-në. Por, ndonëse retorika e njeh sfidën digjitale, instrumentet e integrimit në fushën e sigurisë kibernetike duhet të jenë të hapura për vendet kandidate. ENISA, si aktor kritik në mbrojtjen e infrastrukturës digjitale të BE-së, aktualisht nuk ofron një rrugë formale për pjesëmarrjen e WB6, përveç bashkëpunimit me vende të treta. Kjo nuk do të thotë se nuk ka bashkëpunim mes ENISA-s dhe vendeve të WB6; përkundrazi, drejtuesit e ENISA kanë qenë shumë aktivë në mbështetjen e rajonit. Megjithatë, kjo marrëdhënie duhet thelluar. Duke qenë se BE-ja po kërkon ide për avancimin e integrimit gradual, ENISA është opsioni i duhur – është logjike dhe me përfitim të ndërsjellë.

Një mundësi e rëndësishme ndodhet aktualisht në tryezë: Komisioni Europian po rishikon Aktin e Sigurisë Kibernetike të BE-së, i cili përcakton mandatin, fushëveprimin dhe strukturën e ENISA-s. Ky është momenti i duhur për të përfshirë dispozita ligjore që mundësojnë dhënien e statusit të vëzhguesit për vendet kandidate. Një ndryshim i tillë jo vetëm që do të pasqyronte realitetin gjeopolitik të zgjerimit, por gjithashtu do t’i jepte WB6 mundësinë të kontribuojë në qëndrueshmërinë kibernetike të Europës – që tani, jo vetëm pas anëtarësimit.

Ballkani Perëndimor nuk ndodhet në periferi të digjitalizimit europian – është në zemër të tij. Incidentet kibernetike në një pjesë të Europës nuk janë kurrë thjesht lokale. Sulmet kibernetike të vitit 2022 ndaj Shqipërisë ishin një alarm për të gjithë rajonin, duke treguar se aktorët keqdashës përfitojnë nga boshllëqet institucionale dhe cenueshmëritë rajonale. Fragmentimi i kapaciteteve në fushën e sigurisë kibernetike në WB6 rrit ekspozimin e gjithë kontinentit.

Ajo që rajoni ka nevojë sot është integrimi operacional. Sa i përket marrëdhënieve të avancuara me ENISA dhe statusit të vëzhguesit, kjo do të thotë pjesëmarrje në rrjetet e njohurive të ENISA-s, kontribut në kornizën e certifikimit dhe përafrim me standardet e saj për përgjigje ndaj incidenteve. Integrimi i fazuar në ENISA është mënyra më efektive për të forcuar dhe zhvilluar kapacitetin e rajonit për të parandaluar, zbuluar dhe për t’u përgjigjur ndaj kërcënimeve kibernetike, duke promovuar në të njëjtën kohë konvergjencën ligjore dhe institucionale me normat e BE-së. Udhëheqësit e BE-së dhe vendeve anëtare kanë shprehur mbështetje për integrimin gradual – dhe në këtë kontekst, ENISA është zgjedhja më e logjikshme.

Vendet e rajonit janë të gatshme. Shumica prej tyre kanë krijuar tashmë agjenci kombëtare për sigurinë kibernetike dhe kanë miratuar strategji të përafruara me Direktivën për Sigurinë e Rrjeteve dhe Informacionit (NIS) të BE-së. Por përafrimi me Aktin për Sigurinë Kibernetike të BE-së dhe pjesëmarrja e kuptimplotë në punën e ENISA-s kërkon më shumë sesa reforma të brendshme – kërkon akses.

Ne propozojmë një qasje në tre faza:

1. BE-ja duhet të ndryshojë Aktin e Sigurisë Kibernetike për të lejuar dhënien e statusit të vëzhguesit për vendet e WB6 që plotësojnë kriteret bazë ligjore dhe institucionale – një model që tashmë ekziston për vendet e EEA si Norvegjia dhe Islanda.

2. ENISA dhe Komisioni Europian duhet të kryejnë vlerësime të fizibilitetit dhe të ofrojnë mbështetje teknike për të ndihmuar WB6-në të arrijë standardet e nevojshme.

3. Duhet të hartohet një plan i qartë drejt anëtarësimit të plotë, i lidhur me përparimin e secilit vend në procesin e anëtarësimit në BE dhe përafrimin me standardet e ENISA-s.

Në kuadër të nismës IGNITA, të mbështetur nga Fondacionet e Shoqërisë së Hapur – Ballkani Perëndimor, Qendra Kosovare për Studime të Sigurisë (QKSS) ka publikuar një dokument politik mbi ENISA-n, ku paraqitet në detaje kjo hartë rruge, gjendja aktuale në WB6 për sa i përket sigurisë kibernetike, hapat që duhen ndërmarrë për të qenë të gatshëm për statusin e vëzhguesit, si dhe argumentet pse ky status duhet të mundësohet.

Ky integrim duhet të jetë i barabartë në të gjithë rajonin. Marrëveshjet bilaterale të fragmentuara do të përforconin pabarazitë ekzistuese. Në vend të kësaj, BE-ja duhet të ndjekë një qasje koherente rajonale, duke ndërtuar mbi dinamikën e Procesit të Berlinit dhe prioritetet e përbashkëta të identifikuara në kuadrin e Reformës dhe Mekanizmit të Rritjes. Konkluzionet e udhëheqësve nga Samiti i Procesit të Berlinit në Tiranë në vitin 2023 mbështesin integrimin e Ballkanit Perëndimor në kuadrot e sigurisë kibernetike të BE-së.

Nga këndvështrimi i BE-së, integrimi i fazuar i WB6 në ENISA do të përforconte konkretësinë e angazhimit për zgjerim. Do të ishte gjithashtu një hap praktik drejt rritjes së qëndrueshmërisë, duke ulur sipërfaqen e rrezikut të Tregut Unik Digjital të Europës. Siguria kibernetike është nga natyra e saj transnacionale – prandaj edhe qeverisja e saj duhet të jetë e tillë.

Për ta bërë të qartë: nuk po kërkojmë rrugë të shkurtuara. Integrimi në ENISA duhet të fitohet përmes reformave dhe përafrimit me normat e BE-së. Por, BE-ja nga ana e saj duhet të hapë derën dhe të tregojë se përputhshmëria do të shpërblehet me pjesëmarrje.

Për WB6, bashkimi me ENISA-n do të institucionalizonte bashkëpunimin, do të përforconte një kulturë të standardeve dhe do të nxitë llogaridhënie të ndërsjellë në një fushë ku margjinat për gabime janë gjithnjë e më të vogla. Gjithashtu, do të dërgonte një mesazh të fortë për qytetarët e rajonit tonë: integrimi europian po ndodh, në sektorë konkretë, është i prekshëm dhe është një proces i gjallë që jep rezultate.

Ndërsa Komisioni Europian shtyn përpara zbatimin e Reformës dhe Mekanizmit të Rritjes dhe rishikon Aktin e Sigurisë Kibernetike, momenti për të vepruar është tani. Integrimi në fushën e sigurisë kibernetike për Ballkanin Perëndimor duhet të nisë me ura institucionale. ENISA është pika ideale e nisjes.

*Ky artikull është material i publikuar në European Western Balkans, opinion nga Dr Igli Tafa dhe Mentor Vrajolli: https://europeanwesternbalkans.com/2025/07/11/53121/

Siguria kibernetike, një prioritet i përbashkët BE–Shqipëri

aksk admin — Wed, 11 Jun 2025 10:48:24 +0000

Në përmbyllje të projektit “Cyber Security Rapid Response”, kishim kënaqësinë të mirëprisnim në ambientet e Autoritetit Kombëtar për Sigurinë Kibernetike Ambasadorin e Bashkimit Evropian në Shqipëri, z. Silvio Gonzato.

Ambasadori u prit nga Drejtori i AKSK, z. Igli Tafa, me të cilin ndanë një bisedë mbi rrugëtimin dyvjeçar të këtij projekti dhe mbi sfidat e përbashkëta të sigurisë kibernetike.

Projekti, i financuar nga Bashkimi Evropian dhe i zbatuar nga “e-Governance Academy” i Estonisë, ka kontribuar në forcimin e kapaciteteve në fushën e sigurisë kibernetike dhe përgatitjen e institucioneve për t’u përballur me kërcënimet digjitale në mënyrë më të qëndrueshme dhe të koordinuar.

“Projekti ka kontribuar ndjeshëm jo vetëm për sektorin publik dhe privat, por edhe për përfshirjen e universiteteve dhe mbi 2000 studentëve në ndërtimin e kapaciteteve të reja në këtë fushë,” u shpreh z. Tafa, duke falënderuar Bashkimin Evropian për mbështetjen e vazhdueshme.

“Siguria kibernetike është një ndër prioritetet kryesore të BE-së. Partneriteti ynë me Shqipërinë po forcon qëndrueshmërinë rajonale, kapacitetet teknike dhe bashkëpunimin në një moment kyç,” theksoi Ambasadori Gonzato.

Vizita u përmbyll me një takim të përbashkët ndërmjet përfaqësuesve të AKSK dhe AKSHI, ku u diskutua nevoja për të thelluar bashkëpunimin ndërinstitucional dhe për të çuar përpara përpjekjet e përbashkëta drejt forcimit të sigurisë digjitale në vend, me mbështetjen e Bashkimit Evropian.

Konferenca ‘Dita e Sigurisë Kibernetike’/ Drejtori Igli Tafa: Mbrojtja e Infrastrukturave Kritike Kërkon Strategji dhe Bashkëpunim

aksk admin — Thu, 06 Feb 2025 12:46:00 +0000

Autoriteti Kombëtar për Sigurinë Kibernetike (AKSK) mori pjesë në eventin ‘Dita e Sigurisë Kibernetike’, të organizuar nga Microsoft dhe Soft & Solution, ku u diskutuan sfidat dhe strategjitë për mbrojtjen e infrastrukturave kritike në Shqipëri. Drejtori i AKSK, Igli Tafa, prezantoi masat konkrete të ndërmarra nga Shqipëria për forcimin e sigurisë, duke nënvizuar rëndësinë e ligjit të ri për sigurinë kibernetike, i cili përafron vendin tonë me Direktivën NIS 2 të Bashkimit Europian. Ky ligj krijon një kuadër të qartë për menaxhimin e rreziqeve dhe rritjen e qëndrueshmërisë së sistemeve ndaj kërcënimeve në rritje.

Me identifikimin e 289 infrastrukturave kritike dhe zgjerimin e tyre për shkak të zgjerimit të digjitalizimit të shërbimeve, nevoja për masa më të forta mbrojtëse dhe investime të vazhdueshme në sigurinë kibernetike është më e madhe se kurrë. Gjatë eventit, u theksua rëndësia e bashkëpunimit midis institucioneve publike dhe aktorëve kryesorë të industrisë, ku AKSK dhe AKSHI ndanë përvojat e tyre mbi zbatimin e politikave të sigurisë dhe forcimin e kapaciteteve mbrojtëse. Bashkëpunimi me Microsoft dhe partnerë të tjerë ndërkombëtarë luan një rol kyç në fuqizimin e kapaciteteve teknologjike, rritjen e mbrojtjes ndaj kërcënimeve kibernetike dhe zbatimin e standardeve më të larta të sigurisë.

Një ndër sfidat kryesore mbetet zhvillimi i kapaciteteve njerëzore. Për këtë arsye, AKSK po zbaton një strategji të qartë për trajnimin e operatorëve të infrastrukturave kritike dhe përgatitjen e specialistëve të rinj, me synimin për të ndërtuar një bazë të fortë ekspertësh që mund të adresojnë sfidat e sigurisë në të ardhmen.

Siguria kibernetike është një proces i vazhdueshëm që kërkon një qasje të koordinuar dhe bashkëpunim afatgjatë. AKSK mbetet e përkushtuar për forcimin e mbrojtjes së infrastrukturave kritike, duke punuar me institucionet shtetërore dhe partnerët ndërkombëtarë për të garantuar një hapësirë digjitale të sigurt dhe të qëndrueshme për Shqipërinë.

Shqipëria mirëpret vizitën e parë zyrtare të Qendrës Evropiane për Ekselencë në Trajtimin e Kërcënimeve Hibride

aksk admin — Tue, 22 Oct 2024 12:43:21 +0000

Sot, më 22 tetor 2024, Autoriteti Kombëtar për Sigurinë Kibernetike (AKSK) mirëpriti përfaqësuesit e Qendrës Evropiane të Ekselencës kundër Kërcënimeve Hibride (Hybrid CoE) në vizitën e tyre të parë zyrtare në Shqipëri. Kjo vizitë pason anëtarësimin e Shqipërisë në Hybrid CoE më 13 qershor 2024, duke e bërë vendin tonë anëtarin e 36-të të kësaj qendre. Anëtarësimi përfaqëson një angazhim të Shqipërisë për të përballuar sfidat e kërcënimeve hibride dhe për të zgjeruar bashkëpunimin me vendet aleate të NATO-s dhe BE-së.

Qëllimi i vizitës ishte prezantimi i aktiviteteve të Hybrid CoE dhe shkëmbimi i përvojave për përballimin e kërcënimeve hibride, përfshirë dezinformimin, ndërhyrjet kibernetike dhe sabotazhin. Gjatë takimit u diskutuan gjithashtu mënyrat për rritjen e kapaciteteve dhe ndërgjegjësimit publik mbi kërcënimet hibride, duke forcuar kështu mbrojtjen kombëtare ndaj këtyre sfidave globale.

Drejtori i Përgjithshëm i AKSK, Z. Igli Tafa, theksoi rëndësinë e këtij bashkëpunimi:
“Kërcënimet hibride janë një realitet i ri që përfshin sfida të tilla si dezinformimi dhe sabotazhi. Shqipëria do të përfitojë ndjeshëm nga anëtarësimi në Hybrid CoE, duke pasur qasje në ekspertizën më të mirë ndërkombëtare dhe duke forcuar aftësitë tona për të adresuar këto kërcënime që përhapen ndërkombëtarisht. Ky bashkëpunim do të ndihmojë gjithashtu në zhvillimin e talenteve të reja dhe në përmirësimin e strategjive tona mbrojtëse.”

Z. Tapio Pyysalo, Kreu i Marrëdhënieve Ndërkombëtare të Hybrid CoE, shtoi:
“Shqipëria ka një bazë të fortë dhe ekspertizë të konsiderueshme në fushën e sigurisë kibernetike. Ne jemi të kënaqur që po e zgjerojmë këtë bashkëpunim dhe po ndërtojmë kapacitete të reja për të adresuar kërcënimet hibride, duke përfshirë rritjen e ndërgjegjësimit publik dhe përgatitjen e institucioneve për sfidat e ardhshme.”

Anëtarësimi i Shqipërisë në Hybrid CoE është një mundësi strategjike për të forcuar kapacitetet kombëtare, për të qasur ekspertizën ndërkombëtare dhe për të përfituar nga bashkëpunimet e përbashkëta për sigurinë hibride. Ky bashkëpunim strategjik pozicionon Shqipërinë si një aktor të rëndësishëm në fushën e sigurisë hibride, duke kontribuar në mbrojtjen e interesave kombëtare në një botë gjithnjë e më të digjitalizuar

AKSK mori pjesë në Takimin e Grupit Ndërkombëtar të Punës për Sigurinë Industriale (MISWG), të organizuar për herë të parë në Shqipëri.

aksk admin — Thu, 19 Sep 2024 07:41:02 +0000

AKSK mori pjesë në Takimin e Grupit Ndërkombëtar të Punës për Sigurinë Industriale (MISWG), të organizuar për herë të parë në Shqipëri. Me pjesëmarrjen e 38 shteteve dhe 5 organizatave ndërkombëtare, përfshirë #NATO dhe BE, ky event i rëndësishëm solli në vëmendje sfidat dhe mundësitë në fushën e sigurisë kibernetike dhe industriale.

Autoriteti Kombëtar për Sigurinë Kibernetike prezantoi strategjinë e tij për krijimin e një ekosistemi më të sigurt kibernetik, mbrojtjen e infrastrukturave kritike dhe rritjen e ndërgjegjësimit kombëtar për kërcënimet në rritje të sigurisë kibernetike.

Ky takim shënoi një moment të rëndësishëm për forcimin e bashkëpunimit ndërkombëtar, duke theksuar angazhimin e Shqipërisë për të ndërtuar partneritete të forta, për të mbrojtur informacionin e klasifikuar dhe për të përmirësuar praktikat e sigurisë.