AKSK Archives - AKSK

“Etika në Hacking” – Cybersecurity Talent Club

aksk admin — Tue, 10 Mar 2026 09:12:56 +0000

Autoriteti Kombëtar për Sigurinë Kibernetike zhvilloi takimin e katërt të Cybersecurity Talent Club, i cili këtë herë u fokusua në etikën në hacking dhe kufirin mes kuriozitetit teknik dhe përgjegjshmërisë profesionale në fushën e sigurisë kibernetike. Sesioni përfshiu gjithashtu një ushtrim praktik hands-on, ku pjesëmarrësit eksploruan mënyrat e identifikimit dhe analizimit të dobësive në sisteme.

Në fjalën përshëndetëse, Drejtori i Përgjithshëm në detyrë i AKSK, Saimir Kapllani, theksoi se përmes Cybersecurity Talent Club, Autoriteti synon të mbështesë zhvillimin e talenteve të reja në sigurinë kibernetike, duke krijuar një hapësirë për shkëmbim idesh dhe bashkëpunim mes të rinjve të interesuar në këtë fushë. Ai inkurajoi pjesëmarrësit që përmes këtyre takimeve të zhvillojnë aftësitë e tyre teknike dhe të eksplorojnë ide inovative që mund të shndërrohen në produkte, projekte apo startup-e që i shërbejnë teknologjisë dhe sigurisë kibernetike.

Takimet e Cybersecurity Talent Club vijojnë të ndërthurin diskutimin teorik me praktikën, duke i orientuar pjesëmarrësit drejt roleve dhe aftësive konkrete në sigurinë kibernetike, si dhe duke nxitur zhvillimin e ideve që mund të shndërrohen në projekte apo startup-e të reja.

AKSK falënderon Startup Albania, ProTik, Piramidën e Tiranës dhe Innovation Hub, për mbështetjen në realizimin e këtij eventi.

ECSC 2026: Apliko për të përfaqësuar Shqipërinë në European Cyber Security Challenge

aksk admin — Thu, 26 Feb 2026 09:25:56 +0000

A je gati ta testosh veten në arenën më sfiduese të sigurisë kibernetike në Evropë?

Autoriteti Kombëtar për Sigurinë Kibernetike (AKSK) fton të rinjtë e grupmoshës 14–25 vjeç, të apasionuar dhe të talentuar në fushën e sigurisë kibernetike, të aplikojnë për t’u bërë pjesë e ekipit kombëtar që do të përfaqësojë Shqipërinë në këtë garë prestigjioze ndërkombëtare.

ECSC organizohet nga Agjencia e Bashkimit Evropian për Sigurinë Kibernetike (ENISA) dhe mbledh çdo vit ekipet më të mira kombëtare nga mbi 30 vende të Evropës.

Procesi i përzgjedhjes përfshin teste teknike dhe intervista. Pas fazës së vlerësimit dhe trajnimit, 10 pjesëmarrësit më të spikatur do të përzgjidhen për të përfaqësuar Shqipërinë në fazën finale të garës.

Apliko tani: https://forms.office.com/e/Na4HrdEKyB?origin=lprLink (Afati i fundit: 28 shkurt 2026)

AKSK zhvillon takim me organet ligjzbatuese për koordinimin në sigurinë kibernetike

aksk admin — Fri, 30 Jan 2026 10:21:37 +0000

Autoriteti Kombëtar për Sigurinë Kibernetike zhvilloi një takim me përfaqësues të organeve ligjzbatuese, me fokus forcimin e bashkëpunimit institucional në fushën e sigurisë kibernetike, në përputhje me vizionin e AKSK për ndërtimin e një qasjeje të koordinuar dhe të qëndrueshme në përballimin e kërcënimeve kibernetike.

Takimi u fokusua në prezantimin e kapaciteteve dhe mënyrave të organizimit të secilit institucion, diskutimin e qasjeve për menaxhimin e incidenteve dhe sulmeve kibernetike, si dhe në identifikimin e mundësive për bashkëpunim të mëtejshëm përmes ndarjes së ekspertizës dhe koordinimit teknik, me synimin rritjen e gatishmërisë dhe forcimin e sigurisë institucionale në nivel kombëtar.

Marrëveshje bashkëpunimi AKSK–Universiteti Western Balkans për zhvillimin e kapaciteteve në sigurinë kibernetike

aksk admin — Fri, 30 Jan 2026 10:15:30 +0000

Forcimi i bashkëpunimit me universitetet është një element i rëndësishëm i vizionit të Autoritetit Kombëtar për Sigurinë Kibernetike për zbulimin e talenteve të rinj dhe ndërtimin e kapaciteteve në fushën e sigurisë kibernetike. Në këtë drejtim, AKSK nënshkroi një marrëveshje bashkëpunimi me Universitetin Western Balkans.

Marrëveshja u shoqërua me zhvillimin e një trajnimi “Cyber Drill” për studentët e sigurisë kibernetike të këtij universiteti, i bazuar në skenarë realë dhe ushtrime konkrete reagimi dhe menaxhimi të incidenteve kibernetike.

Ky bashkëpunim i hap rrugën zhvillimit të mëtejshëm të aktiviteteve praktike, trajnimeve dhe iniciativave të përbashkëta, me fokus rritjen e aftësive profesionale të studentëve në fushën e sigurisë kibernetike.

Zhvillohet takim ndërgjegjësues mbi sigurinë digjitale për nxënësit e Shkollës Artistike “Jorndan Misja”

aksk admin — Fri, 09 Jan 2026 12:56:58 +0000

Në vijim të aktiviteteve ndërgjegjësuese në institucionet arsimore, u zhvillua këtë herë një takim informues me nxënësit e Shkollës Artistike “Jordan Misja”, në bashkëpunim me Agjencinë Shtetërore për të Drejtat dhe Mbrojtjen e Fëmijës (ASHDMF), me fokus rritjen e ndërgjegjësimit mbi sigurinë në hapësirën digjitale.

Gjatë bashkëbisedimit u trajtuan rreziqet më të shpeshta online që prekin të rinjtë, mbrojtja e të dhënave personale, sjellja e përgjegjshme në rrjetet sociale si dhe ndikimi i mjedisit digjital në jetën dhe krijimtarinë e tyre.

Këto takime synojnë të forcojnë kulturën e sigurisë digjitale që në moshë të hershme dhe të nxisin përdorimin e sigurt e të ndërgjegjshëm të teknologjisë, në kuadër të angazhimit të vazhdueshëm për informim dhe ndërgjegjësim në shkolla.

Nxënës nga shkolla “Kostandin Kristoforidhi” Elbasan vizitojnë Autoritetin Kombëtar për Sigurinë Kibernetike

aksk admin — Tue, 06 Jan 2026 14:38:45 +0000

Një grup nxënësish nga shkolla “Kostandin Kristoforidhi”, Elbasan, zhvilluan një vizitë informuese në ambientet e Autoriteti Kombëtar për Sigurinë Kibernetike, në kuadër të nismave të vazhdueshme për afrimin e të rinjve me fushën e sigurisë kibernetike dhe rritjen e ndërgjegjësimit mbi rëndësinë e saj.

Gjatë vizitës, ekspertë të AKSK-së prezantuan rolin dhe përgjegjësitë e institucionit, proceset e punës dhe angazhimin e përditshëm në mbrojtjen e hapësirës digjitale të vendit. Nxënësit u njohën gjithashtu me aspekte praktike të sigurisë online, menaxhimin e rreziqeve kibernetike dhe rëndësinë e sjelljes së përgjegjshme në mjedisin digjital.

Përmes këtyre aktiviteteve, Autoriteti Kombëtar për Sigurinë Kibernetike synon jo vetëm ndërgjegjësimin, por edhe nxitjen e interesit dhe zhvillimin e aftësive të të rinjve në fushat e sigurisë kibernetike, duke kontribuar në formimin e brezave të ardhshëm të profesionistëve në një sektor strategjik për sigurinë kombëtare.

Buletini i Lajmeve të Sigurisë Kibernetike Dhjetor 2025

aksk admin — Mon, 05 Jan 2026 11:55:46 +0000

Masat e sigurisë kibernetike gjatë festave, në fokus të takimeve koordinuese me infrastrukturat

aksk admin — Wed, 24 Dec 2025 13:29:58 +0000

Autoriteti Kombëtar për Sigurinë Kibernetike zhvilloi një seri takimesh koordinuese me përfaqësues të infrastrukturave kritike dhe të rëndësishme të informacionit, me fokus forcimin e gatishmërisë dhe koordinimit përballë rreziqeve të shtuara kibernetike gjatë periudhës së festave të fundvitit.

Gjatë takimeve u theksua se periudha festive karakterizohet nga një rritje e ndjeshme e kërcënimeve kibernetike, për shkak të volumit të shtuar të aktiviteteve online. Në këtë kontekst, diskutimet u përqendruan në masat e menjëhershme për monitorim të shtuar të sistemeve, reagim të shpejtë ndaj incidenteve dhe forcim të mekanizmave të shkëmbimit të informacionit në kohë reale.

Një vëmendje e veçantë iu kushtua ndërgjegjësimit të stafit dhe rritjes së gatishmërisë operacionale gjatë kësaj periudhe, si elementë kyç për parandalimin dhe menaxhimin efektiv të incidenteve kibernetike. Paralelisht, u diskutuan edhe drejtimet kryesore të planit afatmesëm për vitin në vijim, i orientuar drejt forcimit të kapaciteteve institucionale përmes trajnimeve të specializuara dhe rritjes së qëndrueshmërisë kibernetike në nivel kombëtar.

Këto takime përbëjnë një hap konkret në përforcimin e bashkëpunimit dhe koordinimit mes aktorëve kryesorë, me qëllim garantimin e sigurisë dhe vazhdimësisë së shërbimeve kritike gjatë festave të fundvitit dhe përgjatë vitit në vijim.

Takim me institucionet financiare dhe të pavarura për ngritjen e Qendrave Sektoriale Operacionale të Sigurisë Kibernetike

aksk admin — Wed, 22 Oct 2025 12:39:52 +0000

Në vijim të zbatimit të Ligjit Nr. 25/2024 “Për Sigurinë Kibernetike” dhe nismës për ngritjen e Qendrave Sektoriale Operacionale të Sigurisë, u zhvillua një takim me përfaqësues të institucioneve financiare dhe të pavarura, të përfshira në këtë proces.

Takimi u fokusua në mënyrën e ngritjes dhe funksionimit të SOC sektorial, duke diskutuar strukturën organizative, modelet e bashkëpunimit dhe nevojën për shkëmbim të vazhdueshëm informacioni ndërmjet aktorëve përkatës.

Ky proces synon të vendosë një sistem të qëndrueshëm monitorimi dhe reagimi në kohë reale, që rrit transparencën, sigurinë dhe besueshmërinë e infrastrukturës digjitale në nivel sektorial dhe kombëtar.

Ballkani Perëndimor bashkohet në Tiranë për dialogun rajonal mbi sigurinë kibernetike

aksk admin — Mon, 20 Oct 2025 12:08:43 +0000

Autoriteti Kombëtar për Sigurinë Kibernetike (AKSK) dhe Ministria e Punëve të Jashtme e Mbretërisë së Hollandës, në bashkëpunim me Observer Research Foundation America dhe Albania Sustainable Development Organization, organizuan në Tiranë një dialog rajonal mbi politikat e sigurisë kibernetike.

Ky aktivitet mblodhi 50 pjesëmarrës nga qeveria, biznesi dhe shoqëria civile nga gjashtë vendet e Ballkanit Perëndimor. Agjenda e takimit trajtoi mënyrat për të përmirësuar bashkëpunimin rajonal në mbrojtjen kibernetike, reagimin ndaj incidenteve, diplomacinë kibernetike dhe ngritjen e kapaciteteve.

Drejtori i Përgjithshëm i AKSK, z. Igli Tafa, u shpreh: “Ende ekziston një hendek i ndjeshëm në fushën e sigurisë kibernetike në të gjithë Ballkanin Perëndimor. Sfida të tilla nuk mund të përballohen të vetëm, por vetëm përmes bashkëpunimit dhe ndërtimit të përbashkët të kapaciteteve mund të ecim përpara.”

Ernst Noorman, Ambasador i Posaçëm për Çështjet e Sigurisë Kibernetike në Ministrinë e Punëve të Jashtme të Mbretërisë së Hollandës, theksoi:
“Siguria kibernetike kërkon përfshirje të shumë aktorëve, nuk është vetëm çështje qeveritare, por përfshin gjithë shoqërinë. Me digjitalizimin që sjell efikasitet, sfidat bëhen gjithnjë e më komplekse. Veprimi i koordinuar dhe besimi i ndërsjellë janë thelbësorë nëse duam të ecim përpara së bashku.”

Ky dialog ndërtohet mbi rezultatet e takimeve të mëparshme të zhvilluara në Tiranë në nëntor 2024 dhe në Shkup, Maqedonia e Veriut, në qershor 2022 dhe shtator 2023.