AKSK

Cybersecurity Talent Club: Eksplorimi i “Hacker’s Toolbox”

aksk admin — Wed, 08 Apr 2026 14:25:05 +0000

Cybersecurity Talent Club vijoi me takimin e gjashtë, duke sjellë në fokus një nga aspektet më praktike të sigurisë kibernetike: përdorimin e mjeteve të ethical hacking.

Në këtë sesion, pjesëmarrësit eksploruan “Hacker’s Toolbox”, duke u njohur me mjetet kryesore të sigurisë dhe rëndësinë e përdorimit të tyre në mënyrë të përgjegjshme. Përmes një trajnimi praktik, u aplikuan teknika reale të ethical hacking, duke ndihmuar në zhvillimin e aftësive konkrete dhe kuptimin më të thellë të sfidave të kësaj fushe.

Takimi u zhvillua me pjesëmarrjen e ekspertëve nga AKSK dhe Vodafone Albania, duke krijuar një hapësirë interaktive për diskutim, pyetje-përgjigje dhe shkëmbim përvojash mes të rinjve dhe profesionistëve të fushës.

AKSK falënderon Startup Albania, ProTik, Piramidën e Tiranës dhe Innovation Hub për mbështetjen në realizimin e këtij eventi.

Ngritja e Standardeve të Sigurisë Kibernetike në fokus të trajnimit me OIKI/ OIRI

aksk admin — Wed, 08 Apr 2026 08:42:54 +0000

Autoriteti Kombëtar për Sigurinë Kibernetike zhvilloi trajnimin me temë “Ngritja e Standardeve të Sigurisë Kibernetike”, në kuadër të takimeve të përjavshme për rritjen e kapaciteteve me infrastrukturat kritike dhe të rëndësishme të informacionit.

Gjatë takimit u trajtua struktura e masave të sigurisë që duhet të zbatohen nga operatorët, të ndara në masa organizative, teknike dhe operacionale. U sqarua mënyra se si këto masa duhet të implementohen dhe të dokumentohen, si dhe përgjegjësia për adresimin në kohë të mangësive të evidentuara.

Përmes këtyre trajnimeve, të mbështetura nga DCAF, synohet forcimi i zbatimit të standardeve të sigurisë dhe rritja e qëndrueshmërisë së infrastrukturave kritike dhe të rëndësishme të informacionit.

Buletini i Lajmeve të Sigurisë Kibernetike Mars 2026

aksk admin — Tue, 07 Apr 2026 10:48:05 +0000

Hapen aplikimet për Girls in ICT 2026 Tirana

aksk admin — Fri, 03 Apr 2026 07:59:08 +0000

Autoriteti Kombëtar për Sigurinë Kibernetike (AKSK) ka kënaqësinë të njoftojë organizimin e aktivitetit global “Girls in ICT 2026”, i cili do të mbahet më 23 prill 2026 në Tiranë, në bashkëpunim me International Telecommunication Union (ITU).

Ky aktivitet përfaqëson një platformë të rëndësishme ndërkombëtare që synon të promovojë përfshirjen e vajzave në fushat e teknologjisë së informacionit dhe komunikimit (ICT), sigurisë kibernetike dhe inovacionit digjital. Përmes këtij organizimi, pjesëmarrëset do të kenë mundësi të ndërveprojnë me profesioniste dhe eksperte të spikatura, si nga niveli kombëtar ashtu edhe ai ndërkombëtar, duke u frymëzuar dhe fuqizuar për të ndërtuar karrierën e tyre në teknologji.

Të gjitha vajzat e interesuara ftohen të regjistrohen përmes linkut të mëposhtëm, deri në datë 10.04.2026.

Ky aktivitet është një mundësi e vyer për të mbështetur dhe promovuar talentet e reja në teknologji, si dhe për të forcuar rolin e vajzave dhe grave në ndërtimin e së ardhmes digjitale.

Link-u regjistrimit: https://forms.cloud.microsoft/e/Ag10uqa03D?origin=lprLink

Raportimi dhe menaxhimi i incidenteve kibernetike në fokus të trajnimit me infrastrukturat kritike dhe të rëndësishme të informacionit

aksk admin — Tue, 31 Mar 2026 09:22:12 +0000

Në vijim të programit të takimeve të përjavshme me infrastrukturat kritike dhe të rëndësishme të informacionit, u zhvillua këtë herë sesioni i radhës me fokus “Raportimi dhe menaxhimi i incidenteve kibernetike”.

Trajnimi u përqendrua në forcimin e mekanizmave të raportimit në kohë, qartësimin e zinxhirit të komunikimit dhe koordinimit ndërinstitucional, si dhe në strukturimin e procesit të menaxhimit të incidenteve nga momenti i evidentimit deri në rikuperimin e plotë të sistemeve. Përmes diskutimeve praktike u theksua rëndësia e dokumentimit, analizës pas incidentit dhe identifikimit të masave për të parandaluar përsëritjen e ngjarjeve të ngjashme.

Në kuadër të këtij sesioni, u zhvillua gjithashtu një cyber drill, i konceptuar si një simulim i një situate reale incidenti kibernetik, i përshtatur për nevojat dhe specifikat e infrastrukturave pjesëmarrëse. Ky ushtrim synoi testimin e procedurave të reagimit, përmirësimin e koordinimit ndërmjet aktorëve dhe rritjen e kapaciteteve praktike në menaxhimin e incidenteve.

Ky takim, mbështetur nga DCAF, kontribuon në rritjen e gatishmërisë operacionale të infrastrukturave dhe në konsolidimin e një qasjeje të unifikuar për reagimin ndaj incidenteve kibernetike.

“Reagimi ndaj incidenteve kibernetike” – Cybersecurity Talent Club

aksk admin — Mon, 30 Mar 2026 09:34:32 +0000

Takimi i radhës i Cybersecurity Talent Club solli në fokus reagimin ndaj incidenteve kibernetike, duke trajtuar mënyrat se si identifikohen, analizohen dhe menaxhohen situatat kritike në kohë reale. Përmes diskutimit të rasteve konkrete, pjesëmarrësit u njohën me sfidat dhe vendimmarrjen që kërkohet në momente kyçe për mbrojtjen e sistemeve dhe të dhënave.

Ekspertë nga AKSK dhe AKSHI ndanë përvojën e tyre mbi praktikat më të mira dhe rëndësinë e koordinimit ndërinstitucional, duke zhvilluar edhe një diskutim të hapur me pjesëmarrësit. Cybersecurity Talent Club vijon të krijojë një hapësirë aktive për të rinjtë, duke i afruar me realitetin e sigurisë kibernetike dhe duke forcuar kapacitetet e tyre profesionale.

AKSK falënderon Startup Albania, ProTik, Piramidën e Tiranës dhe Innovation Hub, për mbështetjen në realizimin e këtij eventi.

AKSK pjesë e MatchMaker Albania 2 – Workshop mbi reagimin dhe menaxhimin e incidenteve kibernetike

aksk admin — Mon, 30 Mar 2026 08:07:54 +0000

Në kuadër të MatchMaker Albania, zona Digital Horizons u shndërrua në një hapësirë dinamike ku u trajtuan zhvillimet më të fundit në teknologji dhe transformim digjital, duke vendosur në fokus edhe rëndësinë e sigurisë kibernetike në këtë ekosistem në zhvillim.

Autoriteti Kombëtar për Sigurinë Kibernetike ishte pjesë aktive duke udhëhequr një workshop të dedikuar mbi “Cyber Incident Response”, ku u prezantuan praktikat më të mira për identifikimin, menaxhimin dhe reagimin ndaj incidenteve kibernetike në kohë reale.

Gjatë këtij sesioni, u trajtuan qasje konkrete për analizimin e incidenteve, koordinimin e reagimit ndërinstitucional dhe forcimin e mekanizmave të raportimit dhe shkëmbimit të informacionit. Gjithashtu, u theksua rëndësia e rritjes së gatishmërisë institucionale dhe e standardizimit të proceseve për përballimin efektiv të kërcënimeve kibernetike.

Në fokus të diskutimeve ishte domosdoshmëria e forcimit të kapaciteteve për reagim ndaj incidenteve kibernetike, si një element kyç për rritjen e qëndrueshmërisë dhe mbrojtjen e infrastrukturave digjitale.

Reagim mbi incidentin kibernetik ndaj Postës Shqiptare

aksk admin — Thu, 26 Mar 2026 13:11:43 +0000

Autoriteti Kombëtar për Sigurinë Kibernetike informon opinionin publik se, më datë 25 mars 2026, është konstatuar një incident kibernetik që ka prekur infrastrukturën e teknologjisë së informacionit të Postës Shqiptare.

Bazuar në vlerësimin paraprak, nuk janë identifikuar të dhëna të enkriptuara apo të fshira, si dhe nuk janë konstatuar ndërprerje të shërbimeve si pasojë direkte e këtij incidenti.

Menjëherë pas marrjes së njoftimit, AKSK ka ndërrmarë të gjitha hapat e parashikuara nga procedurat operative të reagimit ndaj incidenteve, duke ngritur një grup të dedikuar pune, i përbërë nga ekspertë të sigurisë kibernetike. Ky grup ka nisur menjëherë punën në bashkëpunim të ngushtë me stafin teknik të Postës Shqiptare për:

analizimin e thelluar të incidentit dhe verifikimin e çdo komprometimi të mundshëm;
identifikimin e indikatorëve të komprometimit (IOC);
analizën e log-eve dhe event-eve në sistemet kritike;
izolimin dhe sigurimin e sistemeve, me qëllim parandalimin e çdo ndikimi të mëtejshëm.

Në kuadër të masave parandaluese dhe për të mundësuar një analizë të plotë teknike, fillimisht disa shërbime u vendosën përkohësisht jashtë funksioni nga vetë Posta Shqiptare, me rekomandim të Autoritetit. Aktualisht, të gjitha shërbimet publike janë funksionale.

Ndërkohë, në burime të hapura janë publikuar disa të dhëna të dyshuara si të eksfiltruara, të cilat po verifikohen për autenticitetin dhe burimin e tyre. Deri në këtë moment, sasia e të dhënave të mundshme të ekspozuara vlerësohet e kufizuar.

Autoriteti Kombëtar për Sigurinë Kibernetike dënon çdo akt që cënon infrastrukturat kritike të informacionit dhe mbetet i përkushtuar në garantimin e integritetit, konfidencialitetit dhe disponueshmërisë së sistemeve të teknologjisë së informacionit në Republikën e Shqipërisë.

AKSK do të vijojë të informojë publikun në mënyrë transparente mbi zhvillimet e mëtejshme dhe do të publikojë një raport përfundimtar pas përmbylljes së analizës.

Për çdo informacion zyrtar, qytetarët dhe mediat ftohen t’u referohen vetëm kanaleve zyrtare të AKSK.

Panelet dhe diskutimet kryesore në Balkan Cybersecurity Days 2026

aksk admin — Tue, 24 Mar 2026 10:48:39 +0000

Gjatë Balkan Cybersecurity Days 2026 në Shkodër, pjesa e paneleve dhe sesioneve solli diskutime mbi çështjet më kritike të sigurisë kibernetike në nivel rajonal dhe ndërkombëtar. Konferenca, e organizuar nga DCAF, FIRST dhe Autoriteti Kombëtar për Sigurinë Kibernetike (AKSK), në bashkëpunim me Bashkinë Shkodër dhe Western Balkans Cyber Capacity Centre (WB3C), mblodhi ekspertë, përfaqësues institucionesh dhe sektorit privat për të trajtuar tema si menaxhimi i incidenteve, ndarja e informacionit mbi kërcënimet, mbrojtja e infrastrukturave kritike, si dhe zhvillimet e fundit në politikat dhe teknologjitë e sigurisë.

Përmes këtyre paneleve, pjesëmarrësit ndanë përvoja konkrete nga vendet e tyre, diskutuan sfida të përbashkëta dhe prezantuan qasje praktike për forcimin e qendrueshmërisë kibernetike. Diskutimet theksuan rëndësinë e bashkëpunimit rajonal dhe koordinimit ndërinstitucional, duke kontribuar në ndërtimin e një qasjeje më të unifikuar për parandalimin dhe reagimin ndaj incidenteve kibernetike, si dhe në forcimin e rrjeteve profesionale në rajon.

Shqipëria renditet në vendin e 9-të në botë për sigurinë kibernetike sipas NCSI 2026

aksk admin — Tue, 24 Mar 2026 09:04:22 +0000

Shqipëria ka arritur një tjetër progres të rëndësishëm në fushën e sigurisë kibernetike, duke u renditur në vendin e 9-të në botë sipas National Cyber Security Index (NCSI), me një rezultat prej 92.5 pikësh.

Ky pozicionim përfaqëson një përmirësim të ndjeshëm krahasuar me vitet e mëparshme, duke reflektuar një ngjitje të qëndrueshme nga vendi i 54-t në vitin 2023 dhe vendi i 15-të në vitin 2025, drejt një renditjeje ndër vendet më të avancuara në nivel global në këtë fushë.

Vlerësimi i NCSI bazohet në analizën e kapaciteteve kombëtare për menaxhimin e rreziqeve kibernetike, përfshirë kuadrin ligjor dhe politik, mbrojtjen e shërbimeve thelbësore, menaxhimin e incidenteve kibernetike, si dhe zhvillimin e kapaciteteve dhe bashkëpunimin ndërkombëtar. Rezultati i Shqipërisë reflekton përmbushjen e një game të gjerë treguesish që lidhen me organizimin institucional, reagimin ndaj incidenteve dhe masat parandaluese në nivel kombëtar.

Gjatë kësaj periudhe, strukturat përgjegjëse të Autoritetit Kombëtar për Sigurinë Kibernetike kanë menaxhuar me sukses një sërë incidentesh dhe kërcënimesh kibernetike, duke forcuar kapacitetet për identifikimin, analizimin dhe reagimin në kohë reale. Përvoja e krijuar nga këto raste ka kontribuar drejtpërdrejt në përmirësimin e mekanizmave të mbrojtjes dhe në rritjen e qëndrueshmërisë së sistemeve të informacionit në nivel kombëtar.

Sipas raportit, Shqipëria vlerësohet për progresin në forcimin e strukturave përgjegjëse për sigurinë kibernetike, zhvillimin e politikave dhe strategjive kombëtare, si dhe për përmirësimin e mekanizmave të koordinimit dhe reagimit ndaj kërcënimeve në hapësirën digjitale.

Renditja në këtë nivel konfirmon avancimin e Shqipërisë në ndërtimin e një sistemi të qëndrueshëm të sigurisë kibernetike dhe përputhjen me standardet dhe praktikat më të mira ndërkombëtare në këtë fushë.

Çfarë është NCSI?

National Cyber Security Index (NCSI) është një indeks ndërkombëtar që mat nivelin e përgatitjes së shteteve për të parandaluar kërcënimet dhe për të menaxhuar incidentet kibernetike. Ai zhvillohet nga E-Governance Academy (EGA) në Estoni, një organizatë e njohur globalisht për ekspertizën në qeverisjen digjitale dhe sigurinë kibernetike.

Indeksi përfshin 112 shtete dhe vlerëson mbi 40 indikatorë që mbulojnë: kuadrin ligjor dhe institucional, mbrojtjen e shërbimeve kritike dhe të dhënave personale, kapacitetet e reagimit dhe menaxhimit të krizave, si dhe bashkëpunimin ndërkombëtar.

Link-u i raportit: https://ncsi.ega.ee/country/al/