Rekomandime Archives - AKSK

AKSK: 14.6 milionë tentativa për sulme kibernetike ndaj infrastrukturave të informacionit në gjashtëmujorin e parë të vitit 2026

aksk admin — Tue, 04 Aug 2026 11:32:33 +0000

Gjatë gjashtëmujorit të parë, janar–qershor 2026, janë regjistruar gjithsej 14,628,595 tentativa për sulme kibernetike ndaj infrastrukturave të ekosistemit kibernetik shqiptar. Ky numër përkon me rreth 56.4 tentativa për sulme kibernetike çdo minutë.

Nga numri i përgjithshëm, 54% e tentativave janë drejtuar ndaj infrastrukturave të rëndësishme të informacionit, ndërsa 46% ndaj infrastrukturave kritike të informacionit.

Tentativat kanë synuar sektorë të ndryshëm, përfshirë sektorin financiar, administratën publike, infrastrukturën digjitale, sektorin energjetik si dhe sektorë të tjerë të rëndësishëm.

Autoriteti Kombëtar për Sigurinë Kibernetike vijon monitorimin e vazhdueshëm të kërcënimeve dhe forcimin e masave mbrojtëse, me qëllim rritjen e qëndrueshmërisë dhe sigurisë së infrastrukturave të informacionit në vend.

Webinar “Qeverisja e sigurisë kibernetike në epokën e AI”

aksk admin — Fri, 17 Jul 2026 11:19:45 +0000

Qeverisja e sigurisë kibernetike në epokën e AI kërkon një qasje të re ndaj menaxhimit të rreziqeve dhe përdorimit të teknologjive inteligjente.

Autoriteti Kombëtar për Sigurinë Kibernetike organizon webinarin “Qeverisja e sigurisë kibernetike në epokën e AI”, i dedikuar ndaj sfidave që shoqërojnë përdorimin e Inteligjencës Artificiale dhe praktikave që ndihmojnë institucionet dhe kompanitë ta përdorin atë në mënyrë të sigurt dhe të përgjegjshme.

Gjatë webinarit, pjesëmarrësit do të njihen me rëndësinë e qeverisjes së sigurisë kibernetike në kontekstin e Inteligjencës Artificiale, rreziqet që lidhen me përdorimin e saj, si dhe praktikat më të mira për një përdorim të sigurt dhe të përgjegjshëm.

Data: 28 Korrik 2026
Ora: 15:00–16:00
Trajnues: Sokol Manjani

Regjistrohu këtu:
https://events.teams.microsoft.com/event/7804e8d9-cbbe-455d-9911-e98bdda896e7@f5d8b812-606a-42ba-8cf9-3371cfe29c72

Forcimi i qëndrushmërisë kibernetike kombëtare/ AKSK diskuton prioritetet me Infrastrukturat Kritike dhe të Rëndësishme të informacionit

aksk admin — Wed, 01 Jul 2026 13:10:18 +0000

Autoriteti Kombëtar për Sigurinë Kibernetike zhvilloi një takim me përfaqësues të Infrastrukturave Kritike dhe të Rëndësishme të Informacionit, me fokus forcimin e qëndrueshmërisë kibernetike kombëtare dhe thellimin e bashkëpunimit ndërmjet institucioneve publike dhe operatorëve privatë.

Në fjalën e tij, Drejtori i Përgjithshëm i AKSK-së, Bledar Kazia, vlerësoi bashkëpunimin me Infrastrukturat Kritike dhe të Rëndësishme të Informacionit dhe rolin e tyre në forcimin e sigurisë kibernetike në vend. Ai theksoi se, përballë një mjedisi kërcënimesh gjithnjë në zhvillim, raportimi i incidenteve, komunikimi i vazhdueshëm dhe reagimi i koordinuar mbeten elementë kyç për mbrojtjen e infrastrukturave.

Gjatë takimit u diskutuan gjithashtu prioritetet e Autoritetit për periudhën në vijim, përfshirë forcimin e kapaciteteve monitoruese, ngritjen e CSIRT-eve sektoriale dhe mbështetjen e vazhdueshme të infrastrukturave kritike dhe të rëndësishme përmes auditimeve, testimeve të sigurisë dhe trajnimeve të zhvillimit të kapaciteteve.

Takimi shërbeu si një platformë dialogu për adresimin e sfidave të përbashkëta dhe për forcimin e mëtejshëm të bashkëpunimit në funksion të një mjedisi digjital më të sigurt dhe më të qëndrueshëm.

AKSK falënderon DCAF për mbështetjen dhe partneritetin e vazhdueshëm në forcimin e kapaciteteve kombëtare të sigurisë kibernetike.

AKSK nis Programin Kombëtar për Ndërtimin e Kapaciteteve të Sigurisë Kibernetike për SME-të

aksk admin — Fri, 19 Jun 2026 07:49:16 +0000

Autoriteti Kombëtar për Sigurinë Kibernetike zhvilloi trajnimin e parë me përfaqësues të Sipërmarrjeve të Vogla dhe të Mesme (SME), në kuadër të Programit Kombëtar për Ndërtimin e Kapaciteteve të Sigurisë Kibernetike për SME-të. Aktiviteti u fokusua në rritjen e ndërgjegjësimit dhe forcimin e njohurive praktike mbi sigurinë kibernetike në mjedisin e biznesit.

Gjatë trajnimit, pjesëmarrësit u njohën me konceptet bazë të qeverisjes së sigurisë kibernetike, menaxhimit të riskut dhe kontrolleve mbrojtëse, si dhe me praktikat e higjienës kibernetike që ndihmojnë në reduktimin e ekspozimit ndaj kërcënimeve dhe incidenteve kibernetike. Një pjesë e rëndësishme e aktivitetit iu kushtua edhe vlerësimit të maturitetit kibernetik të SME-ve, për të identifikuar nevojat dhe prioritetet për mbështetje të mëtejshme.

Ky program i ndërmarrë nga Autoriteti Kombëtar për Sigurinë Kibernetike, synon të kontribuojë në rritjen e kapaciteteve të sigurisë kibernetike të SME-ve, duke i mbështetur ato në ndërtimin e proceseve dhe praktikave më të sigurta për mbrojtjen e sistemeve, të dhënave dhe shërbimeve të tyre.

Falënderojmë DCAF për mbështetjen në zbatimin e këtij programi dhe të gjithë përfaqësuesit e bizneseve për pjesëmarrjen dhe angazhimin e tyre.

AKSK përmbyll me sukses ciklin e trajnimeve teknike me fokus në mbrojtjen e pajisjeve fundore

aksk admin — Thu, 11 Jun 2026 11:14:52 +0000

Autoriteti Kombëtar për Sigurinë Kibernetike (AKSK) zhvilloi trajnimin e katërt dhe të fundit në kuadër të ciklit të trajnimeve teknike të dedikuara për përfaqësues të disa institucioneve të pavarura, me fokus në Endpoint Detection & Response (EDR) dhe mbrojtjen e pajisjeve fundore nga kërcënimet kibernetike.

Gjatë trajnimit, pjesëmarrësit u njohën me qasje dhe mjete që mundësojnë monitorimin e vazhdueshëm të pajisjeve fundore, identifikimin e aktiviteteve të dyshimta dhe reagimin ndaj incidenteve të sigurisë. Përmes sesioneve praktike, ata eksploruan teknika për zbulimin e kërcënimeve dhe forcimin e mbrojtjes së sistemeve ndaj sulmeve kibernetike.

Ky trajnim përmbylli ciklin e trajnimeve teknike të organizuara nga AKSK, të cilat synuan forcimin e kapaciteteve profesionale të institucioneve në monitorimin, mbrojtjen dhe reagimin ndaj incidenteve kibernetike, si dhe rritjen e qëndrueshmërisë së tyre digjitale.

Falenderim i veçantë për DCAF për mbështetjen dhe bashkëpunimin në realizimin e këtij cikli trajnimesh.

Forcimi i kapaciteteve teknike: AKSK zhvillon trajnimin mbi SIEM dhe analizën e log-eve

aksk admin — Thu, 04 Jun 2026 12:41:52 +0000

Autoriteti Kombëtar për Sigurinë Kibernetike (AKSK) zhvilloi trajnimin e tretë në kuadër të ciklit të trajnimeve për përfaqësuesit teknikë të disa prej institucioneve të pavarura, me fokus në sistemet SIEM (Security Information and Event Management) dhe menaxhimin e log-eve.

Gjatë dy ditëve të trajnimit, pjesëmarrësit u njohën me praktikat dhe proceset që mundësojnë mbledhjen, centralizimin dhe analizimin e log-eve nga sisteme të ndryshme, si dhe me përdorimin e zgjidhjeve SIEM për monitorimin e ngjarjeve të sigurisë dhe identifikimin e aktiviteteve të dyshimta. Përmes sesioneve praktike, ata eksploruan mënyra për të përmirësuar dukshmërinë mbi infrastrukturat teknologjike dhe për të mbështetur reagimin ndaj incidenteve kibernetike.

Ky cikël trajnimesh synon të forcojë kapacitetet profesionale të institucioneve në monitorimin, mbrojtjen dhe reagimin ndaj incidenteve kibernetike, duke kontribuar në rritjen e qëndrueshmërisë së tyre digjitale.

Falenderim i veçantë për DCAF për mbështetjen dhe bashkëpunimin në realizimin e këtij cikli trajnimesh.

AKSK përmbyll aktivitetet ndërgjegjësuese për sigurinë online të fëmijëve për vitin shkollor 2025–2026

aksk admin — Mon, 25 May 2026 10:44:19 +0000

Autoriteti Kombëtar për Sigurinë Kibernetike zhvilloi aktivitetin përmbyllës ndërgjegjësues për këtë vit shkollor me fëmijët e shkollës “Vatra e Dijes” në Tiranë, duke mbyllur një seri aktivitetesh të dedikuara për sigurinë online dhe edukimin digjital të fëmijëve dhe të rinjve.

Përmes bashkëbisedimeve dhe diskutimeve interaktive, fëmijët u njohën me rëndësinë e mbrojtjes së të dhënave personale, përdorimit të sigurt të internetit dhe mënyrave për të identifikuar dhe shmangur rreziqet online.

Gjatë vitit shkollor 2025–2026 janë zhvilluar gjithsej 39 aktivitete ndërgjegjësuese në disa zona të Shqipërisë, duke përfshirë 36 sesione ndërgjegjësimi, 1 webinar, 1 trajnim për Punonjësit e Mbrojtjes së Fëmijëve dhe 1 tryezë të rrumbullakët me pjesëmarrjen e institucioneve përgjegjëse për mbrojtjen e fëmijëve.

Në total, 1,675 fëmijë dhe pjesëmarrës janë bërë pjesë e këtyre aktiviteteve, të cilat synojnë forcimin e kulturës së sigurisë digjitale dhe krijimin e një mjedisi online më të sigurt për brezat e rinj.

Këto aktivitete janë zhvilluar në bashkëpunim me Agjencinë Shtetërore për të Drejtat dhe Mbrojtjen e Fëmijës, në kuadër të përpjekjeve të përbashkëta për rritjen e ndërgjegjësimit dhe mbrojtjes së fëmijëve në hapësirën digjitale.

Shqipëria i bashkohet NATO Cooperative Cyber Defence Centre of Excellence (CCDCOE)

aksk admin — Fri, 15 May 2026 07:16:05 +0000

Shqipëria është tashmë zyrtarisht pjesë e NATO Cooperative Cyber Defence Centre of Excellence (CCDCOE), qendra e ekselencës së NATO-s për mbrojtjen kibernetike, me seli në Tallinn, Estoni.

Anëtarësimi i Shqipërisë u zyrtarizua gjatë ceremonisë së ngritjes së flamurit në selinë e CCDCOE, ku vendi ynë iu bashkua qendrës së bashku me Finlandën dhe Suedinë, duke e çuar në 39 numrin e vendeve anëtare dhe partnere të këtij rrjeti ndërkombëtar të ekspertizës në mbrojtjen kibernetike.

Ky zhvillim përfaqëson një hap të rëndësishëm për Shqipërinë në forcimin e kapaciteteve kombëtare në fushën e sigurisë dhe mbrojtjes kibernetike, si dhe në thellimin e bashkëpunimit me aleatët dhe partnerët ndërkombëtarë të NATO-s në përballjen me kërcënimet dhe sfidat në hapësirën kibernetike.

Pjesëmarrja në CCDCOE i krijon Shqipërisë mundësi për shkëmbim ekspertize, përfshirje në kërkime dhe analiza strategjike, pjesëmarrje në trajnime dhe stërvitje ndërkombëtare, si dhe bashkëpunim më të ngushtë me ekspertë dhe institucione të specializuara nga vendet aleate dhe partnere.

E themeluar në vitin 2008 dhe e akredituar nga NATO, CCDCOE është një nga qendrat më të rëndësishme ndërkombëtare në fushën e mbrojtjes kibernetike, e fokusuar në kërkimin shkencor, analizën strategjike, trajnimet profesionale dhe zhvillimin e praktikave më të mira për forcimin e qëndrueshmërisë kibernetike. Qendra organizon gjithashtu Locked Shields, stërvitjen më të madhe dhe më komplekse në botë në fushën e mbrojtjes kibernetike.

Ky anëtarësim forcon më tej pozicionin e Shqipërisë në ekosistemin ndërkombëtar të sigurisë kibernetike dhe rrit bashkëpunimin me strukturat dhe ekspertët kryesorë të NATO-s në këtë fushë.

AKSK organizon modulin e parë të trajnimeve teknike për institucionet e pavarura

aksk admin — Fri, 15 May 2026 06:21:18 +0000

Autoriteti Kombëtar për Sigurinë Kibernetike (AKSK) zhvilloi modulin e parë të ciklit të trajnimeve teknike për disa institucione të pavarura, me fokus në monitorimin e infrastrukturave dhe forcimin e kapaciteteve praktike në fushën e sigurisë kibernetike.

Në trajnim morën pjesë përfaqësues teknikë nga institucione të ndryshme, të cilët u angazhuan në sesione praktike dhe demonstrime të drejtpërdrejta mbi platformat e monitorimit, identifikimin e problematikave dhe menaxhimin e infrastrukturave teknologjike.

Përmes këtyre trajnimeve, AKSK synon të mbështesë zhvillimin e kapaciteteve teknike dhe bashkëpunimin ndërinstitucional në funksion të rritjes së qëndrueshmërisë kibernetike në vend.

AKSK falënderon DCAF për mbështetjen në zhvillimin e këtyre takimeve.