Lajme Archives - AKSK https://aksk.gov.al/category/lajme/ Thu, 24 Sep 2026 17:14:31 +0000 sq hourly 1 https://wordpress.org/?v=7.1 https://aksk.gov.al/wp-content/themes/aksk-modern/assets/images/favicon-aksk.png Lajme Archives - AKSK https://aksk.gov.al/category/lajme/ 32 32 AKSK në Future2Tech 2026: teknologjia dhe inovacioni duhet të ecin paralelisht me sigurinë kibernetike https://aksk.gov.al/aksk-ne-future2tech-2026-teknologjia-dhe-inovacioni-duhet-te-ecin-paralelisht-me-sigurine-kibernetike/ Thu, 24 Sep 2026 17:14:31 +0000 https://aksk.gov.al/?p=32307 Autoriteti Kombëtar për Sigurinë Kibernetike është këtë vit Partner Platinum i Future2Tech, një nga hapësirat ku teknologjia, inovacioni, biznesi, institucionet dhe të rinjtë takohen për të diskutuar zhvillimet që po formësojnë të ardhmen digjitale.

Panairi nisi sot në Pallatin e Kongreseve me pjesëmarrjen e përfaqësuesve të institucioneve publike, sektorit privat, komunitetit teknologjik, sipërmarrësve, profesionistëve dhe studentëve, në një program që përgjatë dy ditëve sjell diskutime, prezantime dhe aktivitete të fokusuara te inovacioni dhe transformimi teknologjik.

Në fjalën e tij në hapje, Drejtori i Përgjithshëm i AKSK-së, Bledar Kazia, theksoi se ritmi i zhvillimit teknologjik të Shqipërisë duhet të shoqërohet në të njëjtën kohë me forcimin e sigurisë kibernetike, kapaciteteve teknologjike dhe burimeve njerëzore. Ai nënvizoi gjithashtu rëndësinë e bashkëpunimit mes institucioneve, biznesit dhe profesionistëve të rinj për të ndërtuar një ekosistem digjital më të sigurt dhe të qëndrueshëm.

Ky mesazh vijoi edhe në panelin “Innovation for a Safer, Sustainable and Resilient Future”, ku z. Kazia diskutoi mbi sigurinë dhe reziliencën e infrastrukturave digjitale, si elemente që sot lidhen drejtpërdrejt me vazhdimësinë e shërbimeve, ekonominë dhe besimin në transformimin digjital.

Na vizitoni në Pallatin e Kongreseve, njihuni nga afër me punën dhe iniciativat tona dhe na ndiqni për aktivitetet që vijojnë gjatë këtyre dy ditëve.

]]> Trajnim/ Prindërimi në Epokën Digjitale: Çfarë Fshihet Pas Ekranit të Fëmijës Tënd? https://aksk.gov.al/trajnim-prinderimi-ne-epoken-digjitale-cfare-fshihet-pas-ekranit-te-femijes-tend/ Thu, 17 Sep 2026 06:56:49 +0000 https://aksk.gov.al/?p=32288 Sa dimë për atë që fëmijët tanë përjetojnë online? 📱👨‍👩‍👧‍👦

Autoriteti Kombëtar për Sigurinë Kibernetike (AKSK), në bashkëpunim me Ministrinë e Arsimit, organizon takimin: “Prindërimi në Epokën Digjitale: Çfarë Fshihet Pas Ekranit të Fëmijës Tënd?”

Një hapësirë e dedikuar për të folur hapur për sfidat që fëmijët përballojnë në mjedisin digjital dhe për rolin që prindërit kanë në parandalimin dhe adresimin e tyre.

Në fokus të takimit:

🔹 Siguria dhe privatësia e fëmijëve online
🔹 Rrjetet sociale dhe mbrojtja e të dhënave personale
🔹 Bullizmi, ngacmimi dhe format e tjera të dhunës online
🔹 Përmbajtjet dhe kontaktet e papërshtatshme apo të rrezikshme
🔹 Komunikimi dhe besimi mes prindit dhe fëmijës
🔹 Shenjat që duhen vënë re dhe mënyrat e raportimit

Përmes këshillave praktike dhe diskutimit me ekspertë, prindërit do të kenë mundësi të kuptojnë më mirë rreziqet online dhe mënyrat konkrete për t’i mbështetur e mbrojtur fëmijët e tyre.

Takimi do të zhvillohet me pjesëmarrje fizike dhe online.

Për t’u bërë pjesë, regjistrohuni në linkun:
https://forms.cloud.microsoft/e/7AGQNVzV7q?origin=lprLink

Siguria e fëmijëve online është një përgjegjësi e përbashkët.

]]> AKSK prezanton në Kuvend punën dhe zhvillimet kryesore për periudhën janar–gusht 2026 https://aksk.gov.al/aksk-prezanton-ne-kuvend-punen-dhe-zhvillimet-kryesore-per-periudhen-janar-gusht-2026/ Wed, 16 Sep 2026 06:51:04 +0000 https://aksk.gov.al/?p=32203
Drejtori i Përgjithshëm i Autoritetit Kombëtar për Sigurinë Kibernetike, Bledar Kazia, prezantoi përpara Komisionit për Nismat Qytetare, Bashkëpunimin dhe Mbikëqyrjen Institucionale punën e AKSK-së për periudhën janar–gusht 2026 dhe zhvillimet kryesore të institucionit.

Ndër çështjet kryesore të prezantuara:

Forcimi i kuadrit ligjor dhe rregullator – miratimi i Ligjit nr. 51/2026 “Për identifikimin elektronik, shërbimet e besuara dhe portofolin e identitetit digjital”, i përafruar me rregulloret evropiane eIDAS1 dhe eIDAS2. Paralelisht, ka përfunduar procesi i konsultimit publik për amendimet e ligjit nr. 25/2024 “Për sigurinë kibernetike”, me fokus forcimin e masave administrative, detyrimeve për raportim dhe bashkëpunim të infrastrukturave kritike dhe të rëndësishme, si dhe përmbushjen e detyrimeve që lidhen me integrimin evropian.

Integrimi në Bashkimin Evropian – AKSK është e angazhuar në kapitujt 10, 20 dhe 31, me fokus përcaktimin e detyrimeve dhe përgjegjësive, mekanizmat e bashkëpunimit dhe standardizimin e masave të sigurisë dhe qëndrueshmërisë kibernetike. Pjesë e këtij procesi është edhe puna për ngritjen e CIRT-eve sektoriale.

Zgjerimi i mbrojtjes së infrastrukturave kritike dhe të rëndësishme – numri i tyre është rritur nga 215 në 328, duke zgjeruar fushën e mbikëqyrjes dhe mbrojtjes kibernetike.

Parandalimi dhe menaxhimi i incidenteve kibernetike – gjatë vitit 2026 janë regjistruar 20 incidente kibernetike, nga të cilat 4 janë klasifikuar si kritike ose me impakt në të dhëna apo shërbime, ndërsa incidentet e tjera nuk kanë pasur impakt në të dhënat dhe shërbimet e ofruara ndaj publikut.

Rritja e kapaciteteve për monitorim, parandalim dhe reagim – janë rritur kapacitetet njerëzore dhe teknologjike të Autoritetit, ndërsa inteligjenca artificiale është integruar në një pjesë të proceseve të monitorimit dhe po zgjerohet edhe në procese të tjera të punës së AKSK-së.

Ndërgjegjësimi – për herë të parë, siguria kibernetike është përfshirë në programet mësimore përmes 3 moduleve për klasat I, VI dhe X. Paralelisht, vijojnë trajnimet dhe aktivitetet ndërgjegjësuese për nxënës, mësues, prindër, administratën publike dhe infrastrukturat.

]]> AKSK/ Për herë të parë siguria kibernetike bëhet pjesë e kurrikulës shkollore https://aksk.gov.al/aksk-siguria-kibernetike-behet-pjese-e-kurrikules-shkollore/ Fri, 11 Sep 2026 11:18:37 +0000 https://aksk.gov.al/?p=32195 Me nisjen e vitit të ri shkollor 2026–2027, siguria kibernetike do të përfshihet për herë të parë në programet mësimore të arsimit parauniversitar për nxënësit e klasave I, VI dhe X. Tre module kurrikulare kombëtare të miratuara janë përgatitur nga Autoriteti Kombëtar për Sigurinë Kibernetike në bashkëpunim me Agjencinë e Sigurimit të Cilësisë së Arsimit Parauniversitar dhe Ministrinë e Arsimit.
AKSK ka kontribuar me ekspertizë profesionale në hartimin e moduleve, me synimin që edukimi për sigurinë online të mos mbetet vetëm pjesë e fushatave ndërgjegjësuese apo aktiviteteve të veçuara, por të bëhet një proces i qëndrueshëm brenda sistemit arsimor.

Pse nevojitet edukimi për sigurinë online?

Fëmijët janë ndër përdoruesit më aktivë të teknologjisë dhe internetit. Krahas mundësive për të mësuar, komunikuar dhe zhvilluar aftësi të reja, ata mund të përballen me bullizëm kibernetik, mashtrime online, kontakte të rrezikshme, përmbajtje të papërshtatshme, vjedhje të të dhënave dhe keqpërdorim të identitetit.

Për këtë arsye, mbrojtja e fëmijëve në internet duhet të nisë përpara se të ndodhë një problem. Nxënësit kanë nevojë për njohuri dhe shprehi praktike që i ndihmojnë të përdorin teknologjinë në mënyrë të sigurt, të përgjegjshme dhe të ndërgjegjshme.

Një program që përshtatet me moshën e nxënësve

Përmbajtja është ndërtuar si një rrugëtim progresiv. Në klasën I, nxënësit njihen me pajisjet digjitale, mësojnë të dallojnë situatat e sigurta nga ato të pasigurta, të mbrojnë të dhënat personale dhe të kërkojnë ndihmën e një të rrituri kur diçka i shqetëson. Përmes lojërave me role, situatave të simuluara, vizatimeve dhe veprimtarive mbi kohën para ekranit, ata ndërtojnë rregullat e para të sjelljes së sigurt dhe etike online.

Në klasën VI, temat lidhen më drejtpërdrejt me mënyrën se si fëmijët e kësaj moshe përdorin rrjetet sociale, aplikacionet e komunikimit dhe lojërat online. Nxënësit trajtojnë identitetin dhe gjurmën digjitale, bullizmin kibernetik, privatësinë dhe mashtrimet online. Ata analizojnë shembuj phishing-u në email, SMS, telefonata dhe faqe të rreme, ushtrohen të verifikojnë burimin para se të klikojnë dhe mësojnë të përdorin fjalëkalime të forta, bllokimin, ruajtjen e provave dhe raportimin.

Në klasën X, siguria kibernetike lidhet më gjerësisht me qytetarinë digjitale. Krahas mbrojtjes së llogarive, pajisjeve dhe të dhënave, nxënësit analizojnë reputacionin online, kërcënimet kibernetike, etikën dhe të drejtat në mjedisin digjital. Ata zhvillojnë aftësi për të verifikuar burimet, për të dalluar dezinformimin dhe përmbajtjet e manipuluara, për të kuptuar ndikimin e algoritmeve dhe për të reaguar ndaj incidenteve kibernetike.

Kurrikulat zyrtare

Një qasje që do të zgjerohet gradualisht

Zbatimi në klasat I, VI dhe X është faza e parë e një procesi më të gjerë. Në vitet në vijim, synimi është që modulet të shtrihen gradualisht edhe në klasat e tjera duke ndërtuar një vazhdimësi të edukimit për sigurinë kibernetike në cikle të ndryshme të shkollimit.

Roli i prindërve dhe i mësuesve

Siguria e fëmijëve online është përgjegjësi e përbashkët. Shkolla, familja dhe institucionet duhet të nxisin komunikimin e hapur, në mënyrë që fëmija të ndihet i sigurt të tregojë kur has një situatë shqetësuese online. Qëllimi nuk është largimi i fëmijëve nga teknologjia, por përdorimi i saj në mënyrë të sigurt.

 

]]> Një laborator për Ballkanin Perëndimor: AKSK dhe GIZ zgjerojnë bashkëpunimin në sigurinë kibernetike https://aksk.gov.al/nje-laborator-per-ballkanin-perendimor-aksk-dhe-giz-zgjerojne-bashkepunimin-ne-sigurine-kibernetike/ Thu, 27 Aug 2026 14:27:33 +0000 https://aksk.gov.al/?p=32158
Laboratori i Sigurisë Kibernetike pranë Autoritetit Kombëtar për Sigurinë Kibernetike po fuqizohet me pajisje të reja teknike, me mbështetjen e Shoqërisë Gjermane për Bashkëpunim Ndërkombëtar (GIZ), në kuadër të bashkëpunimit mes dy institucioneve.

Pajisjet u dorëzuan në kuadër të Memorandumit të Mirëkuptimit për “Laboratorin e Sigurisë Kibernetike të Ballkanit Perëndimor: Trajnim, Inovacion dhe Shkëmbim Ekspertize” (Western Balkans Cybersecurity Laboratory), i cili synon zhvillimin e laboratorit pranë AKSK-së në një qendër rajonale për trajnime të avancuara, simulime, shkëmbim njohurish dhe bashkëpunim mes ekspertëve të vendeve të Ballkanit Perëndimor.

Infrastruktura e re do të krijojë mundësi për zhvillimin e aftësive praktike të profesionistëve dhe studentëve të rajonit, veçanërisht në reagimin ndaj incidenteve, forenzikën digjitale, testimin e penetrimit dhe qëndrueshmërinë kibernetike.

Drejtori i Përgjithshëm i AKSK-së, Bledar Kazia, vlerësoi mbështetjen e GIZ dhe Qeverisë Federale Gjermane, duke theksuar se zgjerimi i këtij bashkëpunimi krijon mundësi të reja për të ndarë ekspertizën dhe për të ndërtuar kapacitete të përbashkëta me partnerët e Ballkanit Perëndimor.

Mbështetja realizohet përmes projektit “Partneriteti për Forcimin e Sigurisë Kibernetike”, financuar nga Ministria Federale e Jashtme e Gjermanisë dhe zbatuar nga GIZ.

]]> Shqipëria renditet e para në botë për sigurinë kibernetike sipas NCSI 2026 https://aksk.gov.al/shqiperia-renditet-e-para-ne-bote-per-sigurine-kibernetike-sipas-ncsi-2026/ Thu, 20 Aug 2026 08:20:14 +0000 https://aksk.gov.al/?p=32057 Shqipëria, e para në botë për sigurinë kibernetike sipas NCSI

Shqipëria renditet në vendin e parë në botë në National Cyber Security Index (NCSI), me një rezultat prej 98.33 pikësh, duke u pozicionuar në krye të klasifikimit global për nivelin e zhvillimit të kapaciteteve kombëtare në fushën e sigurisë kibernetike.

Ky pozicionim shënon një përmirësim të ndjeshëm dhe të qëndrueshëm në renditjen ndërkombëtare: nga vendi i 54-t në vitin 2023, në vendin e 15-të në vitin 2025 dhe tashmë në vendin e parë në botë.

National Cyber Security Index vlerëson kapacitetet e vendeve për parandalimin dhe menaxhimin e rreziqeve kibernetike, mbrojtjen e shërbimeve thelbësore, reagimin ndaj incidenteve, zhvillimin e politikave dhe strategjive kombëtare, edukimin dhe formimin profesional, si dhe bashkëpunimin ndërkombëtar.

Rezultati i Shqipërisë pasqyron progresin e arritur në forcimin e kuadrit ligjor dhe strategjik, konsolidimin e strukturave përgjegjëse, zhvillimin e kapaciteteve institucionale dhe profesionale, si dhe përmirësimin e mekanizmave të koordinimit, parandalimit dhe reagimit ndaj kërcënimeve kibernetike.

Kjo renditje reflekton gjithashtu punën e vazhdueshme të Autoritetit Kombëtar për Sigurinë Kibernetike për rritjen e qëndrueshmërisë së infrastrukturave kritike dhe të rëndësishme të informacionit, forcimin e bashkëpunimit kombëtar dhe ndërkombëtar dhe zhvillimin e një ekosistemi të sigurt e të qëndrueshëm kibernetik.

Renditja në vendin e parë konfirmon avancimin e Shqipërisë në fushën e sigurisë kibernetike dhe përputhjen e kapaciteteve kombëtare me standardet dhe praktikat më të mira ndërkombëtare.

Linku i raportit: https://ncsi.ega.ee/country/al/

]]> AKSK zhvillon dëgjesa publike për ndryshimet në projektligjin për sigurinë kibernetike https://aksk.gov.al/aksk-zhvilloi-degjesa-publike-per-ndryshimet-ne-projektligjin-per-sigurine-kibernetike/ Thu, 06 Aug 2026 07:24:39 +0000 https://aksk.gov.al/?p=31842
Autoriteti Kombëtar për Sigurinë Kibernetike zhvilloi dëgjesat publike mbi ndryshimet e propozuara në projektligjin “Për disa shtesa dhe ndryshime në ligjin nr. 25/2024 ‘Për sigurinë kibernetike’”, me pjesëmarrjen e përfaqësuesve të institucioneve shtetërore, operatorëve të infrastrukturave kritike dhe të rëndësishme të informacionit, si dhe sektorit bankar.

Drejtori i Përgjithshëm i AKSK-së, z. Bledar Kazia, së bashku me përfaqësues të institucionit, prezantoi risitë e parashikuara në projektligj dhe ndikimin e tyre në forcimin e sigurisë kibernetike në nivel kombëtar. Gjatë prezantimit, u trajtuan në mënyrë të detajuar ndryshimet sipas neneve përkatëse, si dhe sfidat dhe nevojat që kanë diktuar propozimin e tyre.

Në kuadër të diskutimeve, pjesëmarrësit paraqitën komentet dhe sugjerimet e tyre, ndërsa ekspertët e AKSK-së ofruan sqarimet e nevojshme mbi aspektet kryesore të projektligjit.

Ndryshimet e propozuara synojnë rritjen e efektivitetit të mekanizmave të mbrojtjes kibernetike, forcimin e kapaciteteve për parandalimin dhe reagimin ndaj incidenteve, përcaktimin më të qartë të detyrimeve të operatorëve, si dhe krijimin e mekanizmave të rinj të mbikëqyrjes. Këto masa synojnë rritjen e nivelit të sigurisë dhe qëndrueshmërisë së ekosistemit kibernetik në Republikën e Shqipërisë.

]]> AKSK zhvillon Ushtrimin Kombëtar Simulues për Menaxhimin e Krizave Kibernetike https://aksk.gov.al/aksk-zhvillon-ushtrimin-kombetar-simulues-per-menaxhimin-e-krizave-kibernetike/ Wed, 08 Jul 2026 12:23:37 +0000 https://aksk.gov.al/?p=31416
Autoriteti Kombëtar për Sigurinë Kibernetike (AKSK) organizoi Ushtrimin Kombëtar Simulues për Menaxhimin e Krizave Kibernetike, me pjesëmarrjen e institucioneve shtetërore dhe përfaqësuesve të operatorëve të infrastrukturave kritike dhe të rëndësishme të informacionit në vend.
Ushtrimi u zhvillua në kuadër të zbatimit të Planit Kombëtar të Reagimit ndaj Incidenteve të Sigurisë Kibernetike në Shkallë të Gjerë dhe ndaj Krizës Kibernetike. Përmes një skenari simulues, u testuan procedurat kombëtare të menaxhimit të krizave, koordinimi ndërinstitucional, shkëmbimi i informacionit, vendimmarrja dhe reagimi ndaj incidenteve me ndikim të gjerë.
Në fjalën e tij, Drejtori i Përgjithshëm i AKSK dhe Koordinatori Kombëtar për Sigurinë Kibernetike, Bledar Kazia, theksoi se ushtrimi synon të vlerësojë gatishmërinë e institucioneve për të koordinuar dhe reaguar në mënyrë efektive, duke garantuar vazhdimësinë e shërbimeve jetike për qytetarët.
Ai nënvizoi se, pas sulmeve kibernetike të vitit 2022, Shqipëria ka forcuar arkitekturën kombëtare të sigurisë kibernetike përmes legjislacionit të ri, mekanizmave të koordinimit institucional dhe ngritjes së CERT-it Kombëtar. Sipas tij, menaxhimi efektiv i një krize nuk varet vetëm nga teknologjia, por edhe nga koordinimi, komunikimi në kohë dhe zbatimi i roleve të përcaktuara.
AKSK shpreh mirënjohjen ndaj DCAF – Geneva Centre for Security Sector Governance, UK International Development dhe Ministrisë Federale të Punëve të Jashtme të Gjermanisë për mbështetjen në zhvillimin e këtij ushtrimi.

 

 

]]> Siguria Kibernetike, Inteligjenca Artificiale dhe Bashkëpunimi Rajonal në Fokus të Diskutimeve në Western Balkans Cyber Camp 2026 https://aksk.gov.al/siguria-kibernetike-inteligjenca-artificiale-dhe-bashkepunimi-rajonal-ne-fokus-te-diskutimeve-ne-western-balkans-cyber-camp-2026/ Wed, 20 May 2026 12:43:24 +0000 https://aksk.gov.al/?p=30461 Western Balkans Cyber Camp 2026 nisi me një seri fjalësh përshëndetëse, panelesh diskutimi dhe sesionesh ekspertësh, të fokusuara në forcimin e bashkëpunimit rajonal dhe adresimin e sfidave në zhvillim të sigurisë kibernetike me të cilat përballet rajoni i Ballkanit Perëndimor.

Pjesëmarrësit u angazhuan në diskutime mbi qëndrueshmërinë kibernetike, kërcënimet e nxitura nga inteligjenca artificiale, sigurinë ofensive, transformimin digjital dhe rëndësinë gjithnjë në rritje të mbrojtjes së infrastrukturave kritike digjitale në një rajon gjithnjë e më të ndërlidhur.

Gjatë fjalës së tij hapëse, Drejtori i Përgjithshëm i AKSK-së, Bledar Kazia, theksoi se siguria kibernetike sot shkon përtej dimensionit teknik, duke u lidhur ngushtë me sigurinë kombëtare, zhvillimin ekonomik dhe stabilitetin rajonal. Ai nënvizoi rëndësinë e bashkëpunimit rajonal, shkëmbimit të njohurive dhe forcimit të lidhjeve mes profesionistëve të rinj në Ballkanin Perëndimor, duke inkurajuar pjesëmarrësit që WBCC 2026 ta shfrytëzojnë jo vetëm si një hapësirë për të mësuar dhe zhvilluar ushtrime kibernetike, por edhe si një mundësi për të ndërtuar bashkëpunim afatgjatë dhe për të shkëmbyer eksperienca përtej kufijve.

Folësit përgjatë sesioneve theksuan gjithashtu rolin thelbësor të profesionistëve të rinj, inovacionit, besimit dhe kapitalit njerëzor në ndërtimin e shoqërive digjitale të sigurta dhe të qëndrueshme, duke inkurajuar pjesëmarrësit të vijojnë forcimin e lidhjeve dhe bashkëpunimit rajonal edhe përtej kampit.

AKSK shpreh mirënjohje të sinqertë për të gjithë folësit, ekspertët, pjesëmarrësit dhe partnerët që kontribuuan në organizimin e WBCC 2026, veçanërisht GIZ, Western Balkans Cyber Capacity Center (WB3C), Regional Cooperation Council (RCC) dhe OSCE Presence in Albania, për mbështetjen e vazhdueshme në avancimin e bashkëpunimit dhe ngritjes së kapaciteteve në fushën e sigurisë kibernetike në rajon.

 

]]>