Autoriteti Kombëtar për Sigurinë Kibernetike (AKSK) ka hapur thirrjen për aplikime për Western Balkans Cybersecurity Marathon for Girls & Women 2026, e cila u drejtohet vajzave dhe grave nga Shqipëria, Bosnja dhe Hercegovina, Kosova, Mali i Zi, Maqedonia e Veriut dhe Serbia.

Gjatë Maratonës, pjesëmarrëset do të përfshihen në sesione interaktive trajnimi, laboratorë praktikë dhe sfida të sigurisë kibernetike, të zhvilluara përmes një platforme të dedikuar online. Programi synon t’u japë pjesëmarrëseve përvojë praktike, të forcojë aftësitë e tyre teknike dhe t’i bëjë pjesë të një komuniteti rajonal të vajzave dhe grave të reja të interesuara për zhvillimin e një karriere në sigurinë kibernetike. Në përfundim të Maratonës, pjesëmarrëset që do të arrijnë rezultatet më të larta do të shpërblehen me çmime.

Maratona është e hapur për vajza dhe gra të moshës 16–26 vjeç, të cilat janë studente, të sapodiplomuara ose në hapat e parë të karrierës në sigurinë kibernetike, teknologjinë e informacionit, shkencat kompjuterike, inxhinierinë kompjuterike, telekomunikacionin apo fusha të ngjashme.

Ky është edicioni i dytë i Maratonës, një nismë e nisur nga AKSK në vitin 2025 me fokus te fuqizimi dhe përfshirja e vajzave dhe grave të reja në sigurinë kibernetike. Pas edicionit të parë, këtë vit nisma zgjerohet në nivel rajonal, duke përfshirë pjesëmarrëse nga gjashtë vendet e Ballkanit Perëndimor.

Afati i aplikimit: 12 tetor 2026.
Apliko këtu: https://forms.cloud.microsoft/e/6GALVrfZiR?origin=lprLink

Drejtori i Përgjithshëm i AKSK-së, Bledar Kazia, theksoi se mbrojtja e fëmijëve online nis nga një marrëdhënie besimi me prindërit, ku mbikëqyrja shoqërohet me këshillim dhe fëmijët ndihen të lirë të tregojnë çfarë i shqetëson. Ai nënvizoi rëndësinë e edukimit të hershëm për sigurinë digjitale, përmes përfshirjes së sigurisë kibernetike në klasat e para, të gjashta dhe të dhjeta, në bashkëpunim me Ministrinë e Arsimit, si dhe vijimit të trajnimeve për prindërit, mësuesit dhe fëmijët.

Zëvendëskryeministrja Albana Koçiu nënvizoi se teknologjia duhet t’u shërbejë fëmijëve për të mësuar, krijuar dhe komunikuar, duke ruajtur sigurinë dhe mirëqenien e tyre. Ajo theksoi se përgjegjësia e përbashkët është t’i përgatisim fëmijët për të ardhmen dhe t’u japim prindërve njohuritë e mjetet e nevojshme për t’i mbrojtur.

Ministrja e Arsimit, Mirela Kumbaro, vuri theksin te partneriteti shkollë–familje dhe përfshirja aktive e prindërve në edukimin e fëmijëve, duke u ndalur te programi pas shkolle dhe “Çanta e prindit”.

Në aktivitet morën pjesë edhe përfaqësues të Policisë së Shtetit dhe Agjencisë Shtetërore për të Drejtat dhe Mbrojtjen e Fëmijëve. Gjatë trajnimit u dhanë orientime praktike për njohjen e rreziqeve online, reagimin ndaj përmbajtjeve dhe kontakteve të papërshtatshme, si dhe komunikimin me fëmijët për shqetësimet që hasin në internet.

Panairi nisi sot në Pallatin e Kongreseve me pjesëmarrjen e përfaqësuesve të institucioneve publike, sektorit privat, komunitetit teknologjik, sipërmarrësve, profesionistëve dhe studentëve, në një program që përgjatë dy ditëve sjell diskutime, prezantime dhe aktivitete të fokusuara te inovacioni dhe transformimi teknologjik.

Në fjalën e tij në hapje, Drejtori i Përgjithshëm i AKSK-së, Bledar Kazia, theksoi se ritmi i zhvillimit teknologjik të Shqipërisë duhet të shoqërohet në të njëjtën kohë me forcimin e sigurisë kibernetike, kapaciteteve teknologjike dhe burimeve njerëzore. Ai nënvizoi gjithashtu rëndësinë e bashkëpunimit mes institucioneve, biznesit dhe profesionistëve të rinj për të ndërtuar një ekosistem digjital më të sigurt dhe të qëndrueshëm.

Ky mesazh vijoi edhe në panelin “Innovation for a Safer, Sustainable and Resilient Future”, ku z. Kazia diskutoi mbi sigurinë dhe reziliencën e infrastrukturave digjitale, si elemente që sot lidhen drejtpërdrejt me vazhdimësinë e shërbimeve, ekonominë dhe besimin në transformimin digjital.

Na vizitoni në Pallatin e Kongreseve, njihuni nga afër me punën dhe iniciativat tona dhe na ndiqni për aktivitetet që vijojnë gjatë këtyre dy ditëve.

AKSK publikon analizën teknike të HEAVYGRAM, i njohur edhe si CHOSEN BRICK, i përdorur në fushata spiunazhi kibernetik kundër aktivistëve dhe gazetarëve në vende të ndryshme. Sipas analizës, këto veprimtari lidhen me aktorë kibernetikë që veprojnë në emër të Ministrisë së Inteligjencës dhe Sigurisë së Iranit (MOIS).

Dokumenti shqyrton skedarin keqdashës, mekanizmat e ekzekutimit dhe qëndrueshmërisë në sistem, komunikimin me infrastrukturën e komandimit dhe kontrollit (C2), funksionet keqdashëse dhe indikatorët e komprometimit. Analiza përmban gjithashtu rekomandime konkrete për identifikimin, monitorimin dhe adresimin e rasteve të mundshme të komprometimit.

Lexoni analizën e plotë: https://aksk.gov.al/analize-teknike-mbi-skedarin-keqdashes-heavygram-fushate-e-lidhur-me-mois/